بايدەن ۇكىمەتى 5 اقپاندا مەرزىمى بىتەتىن اقش-رەسەي اراسىنداعى  يادرولىق كەلىسىمدى العاشقى ادىمدا تاعى 5 جىلعا ۇزارتا تۇرۋدى ۇسىنباق. 21 قاڭتار بەيسەنبى كۇنگى بايدەن ۇكىمەتىنىڭ وكىلدەرى وسىنداي مالىمدەمە تاراتتى.

اق ءۇي رەسميلەرىنىڭ مالىمەتىندە، بايدەننىڭ قاۋىپسىزدىك جونىندەگى كەڭەسشىسى جەيك سالليۆان بۇل ۇسىنىستى رەسەيدىڭ اقش-تاعى ەلشىسى اناتولي انتونوۆقا بەيسەنبى كۇنى تۇستەن كەيىن جاساعان.

ساراپشىلاردىڭ پىكىرىنشە، بۇل ۇسىنىس رەسەي مەن اقش-تىڭ ەۋروپاداعى وداقتاستارى ءۇشىن قابىلداۋعا جەڭىل. ال، وسىمەن ءبىر كۇندە ناتو باس حاتشىسى يەنس ستولتونبەرگ تە مالىمدەمە جاساپ، اقش پەن رەسەي كەلىسىمدى ءتىپتى دە كەڭەيتە ءتۇسۋى كەرەك ەكەنىن ايتقان. ول بريۋسسەلدە جۋرناليستەرگە بەرگەن جاۋابىندا: «ءبىز يادرولىق وق تۇمسىقتارعا شەكتەۋ قوياتىن كۇيگە تۇسپەۋىمىز كەرەك. ال، «ستراتەگيالىق قارۋدى قىسقارتۋ تۋرالى جاڭا كەلىسىم» بىرنەشە كۇننەن كەيىن اياقتالادى»، – دەگەن. ونىڭ ايتۋىنشا بۇل كەلىسىم سوڭعى ەمەس، الدا قارۋ-جاراقتى قاداعالاۋدىڭ جاھاندىق كەلىسىمىنە قول جەتكىزۋ ءۇشىن كۇش سالۋ كەرەك.

اقش پەن رەسەي اراسىنداعى اتالعان يادرولىق قارۋلارعا قاتىستى كەلىسىم 2010 جىلى ەكس-پرەزيدەنتتەر وباما مەن مەدۆەتوۆتىڭ قول قويۋىمەن جاسالعان بولاتىن. شارتقا سايكەس ەكى ەلدىڭ ورنالاستىرعان بەلسەندىلىككە يە يادرولىق وق تۇمسىقتارىنىڭ سانى 1150-دەن اسپاۋى كەرەك بولعان. الايدا، پرەزيدەنت ترامپ بۇل كەلىسىمدى «قۇراما شتاتتاردى قولايسىز جاعدايعا قالدىردى» دەپ سىنعا العان ەدى.