اقش رەسەي مەن قىتايدى كوپتەگەن جىلداردان بەرى اشىق تەڭىز ەركىندىگىن بۇزىپ، وزگە ەلدەردىڭ ەگەمەندىگىنە قاۋىپ توندىرۋدە دەپ ايىپتاپ كەلەدى. سوعان ساي كەشە، 11 قاڭتار كۇنى اقش اسكەري-تەڭىز وپەراتسيالارى جونىندەگى دەپارتامەنتى اقش اسكەري-تەڭىز كۇشتەرىنىڭ قىتاي مەن رەسەيگە قاراعاندا تەڭىزدەگى اسكەري باسىمدىعىن ساقتاۋ بويىنشا بولاشاق ارەكەتتەرىن بەلگىلەيتىن 10 جىلدىق جوسپارىن جاريالادى.

اتالعان دەپارتامەنت جاريا ەتكەن جوسپار 18 بەتتەن تۇرادى. دەپارتامەنتتىڭ حاتشىسى جانە ادميرال مايكل گيلداي مالىمدەمەسىندە قىتاي مەن رەسەيدىڭ تەڭىزدەگى ارەكەتتەرىن ايىپتاپ بىلاي دەدى: «بۇل ەكى ەل دە ءوز اۋماقتارىنان تىس تەڭىزدەردەگى قىمبات رەسۋرستارعا ادىلەتسىزدىكپەن يەلىك ەتۋ ءۇشىن بار كۇشىن سالىپ كەلەدى; ەكەۋى دە ءوز كورشىلەرىن قورقىتىپ، ۇركىتىپ، زاڭسىز، ادىلەتسىز تالاپتارىن ورىنداتۋعا تىرىسادى; ماڭىزدى سۋ جولدارىن ءوز باقىلاۋىنا الۋعا تىرىسىپ، باسقارىلمالى زىمىراندار جانە سول سەكىلدى كۇردەلى اسكەري تەحنيكالاردىڭ جۇيەسىن قۇرۋدا. ولاردىڭ ارەكەتتەرى تەڭىزدەگى ەركىندىك پەن بىرقاتار مەملەكەتتەردىڭ ەگەمەندىگىنە تىكەلەي قاۋىپ توندىرەدى».

بۇعان قوسا مايكل گيلداي قىتايدىڭ اقش-پەن باسەكەلەسەتىن تەڭىز كۇشتەرىن جاساقتاپ جاتقانىن، سونىسىمەن دە قىتاي اقش-تىڭ ەڭ قاۋىپتى ستراتەگيالىق قارسىلاسى ەكەنىن تاعى دا ءبىر ەسكەرتىپ ءوتتى.

«ءبىزدىڭ باعىتىمىز ايقىن»، – دەدى گيلداي، – ءبىزدىڭ بوس ۋاقىتىمىز جوق. الداعى ون جىلدىقتا جاسايتىن ءىس-ارەكەتتەرىمىزبەن ءبىز تۇتاس عاسىرداعى تەڭىز كۇشتەرىنىڭ تەپە-تەڭدىگىن ساقتايتىن بولامىز»، – دەگەن پىكىرىن ايتقان.

اقش اسكەري-تەڭىز وپەراتسيالارى جونىندەگى دەپارتامەنتتىڭ جوسپارى ءتورت نەگىزگى باعىتتى دامىتۋعا باسا نازار اۋدارعان. ايتالىق، سالاداعى كادرلاردى دايىنداۋ، مامانداندىرۋعا ينۆەستيتسيا سالۋ; تەحنيكالىق قامتاماسىز ەتۋدى جەتىلدىرۋ; سالاعا قاتىستى جەلىلىك كەمەلدىلىك جانە جاساندى سانانى پايدالانۋعا ينۆەستيتسيا سالۋ; وزىق سوعىس كەمەلەرىنىڭ ۇلكەن قوسىنىنا يە بولۋ.

بۇعان قوسا حابارلامادا اقش ءوزىنىڭ وداقتاس سەرىكتەستەرىمەن بىرگە تەڭىزدەگى ەركىندىكتى قورعاۋ جانە اگرەسسيانى توقتاتۋعا اسكەري كۇشتەردى جىبەرۋدى قامتاماسىز ەتۋگە جۇمىس ىستەيتىنىن ايتقان.

“The Qazaq Times”