تۇلكىباس ازاماتتارى اۋرۋحاناعا 23 وتتەگى كوتسەنتراتورىن، قوسىمشا جابدىقتار اپەردى.

جاز باستالعالى بەرى ءورشىپ، ەندى بەتى قايتىپ جاتقان ىندەتتىڭ كەزىندە مەملەكەتتىك سەكتوردان تىس ەل ازاماتتارى قاجەتتى قۇرىلعىلاردى الۋعا وزدەرىنشە اتسالىسقانى بەلگىلى.

سونىڭ ءبىر مىسالى تۇركىستان وبلىسىنا قاراستى تۇلكىباس اۋدانىنىڭ تۋمالارى مەن تۇرعىندارى ءوز بەتىنشە جىلۋ جيناپ، ورتادان ورتالىق اۋرۋحاناعا كەرەك وتتەگى كونتسەنتراتورلارىن سىيعا الىپ بەردى.

اۋرۋحانا قىزمەتكەرلەرىنە تۇسكى اس تاراتىپ جاتقان ەرىكتىلەر. فوتو: ەرىكتىلەردەن

ناقتىراق ايتقاندا، اۋدان اكىمدىگىنىڭ ۇيىمداستىرۋىمەن پاندەميانىڭ قيىن شاعىندا تۇلكىباستىق ەرىكتىلەر سوڭعى ءبىر ايدا وسى قۇرىلعىنىڭ 23 داناسىن، 360 دانا ارنايى مەديتسينالىق قورعانىش كيىمىن، 210 دانا وتتەگى بالونىن، 5 دانا اۆتوماتتاندىرىلعان كىر جۋ ماشيناسىن، 15 پۋلسوكسيمەتر جانە بولمە-پالاتالاردى زالالسىزداندىرۋعا قاجەتتى كۆارتس لامپالارىن تابىستاعان. سونداي-اق، اۋدان ەرىكتىلەرى قاۋىرت كەزدە مەديتسينا سالاسىنىڭ قىزمەتكەرلەرىنە تۇسكى اس ۇلەستىرۋ ءىسىن  ۇيىمداستىرعان.

اۋداندىق ورتالىق اۋرۋحاناعا جەتكىزىلگەن وتتەگى رەتتەگىش قۇرىلعىلارى. فوتو: ەرىكتىلەردەن

قازىرگى تاڭدا اۋداندىق اۋرۋحانادا جالپى ەسەبى 24 وتتەگى كونتسەنتراتورى بار. بۇدان بولەك، ءبىر مەزەتتە 64 ناۋقاس وتتەگىمەن دەم الا الاتىن نۇكتەلەر ورناتىلعان.

اۋدان اكىمدىگىنىڭ ءباسپاسوز قىزمەتىنىڭ دەرەگىنشە، اۋدان قۇرامىنا كىرەتىن ەلدى مەكەندەردە ۇيدە ەمدەلىپ جاتقان ادامداردىڭ جاعدايىن باقىلاۋعا ارنايى 22 مەديتسيانالىق بريگادا قۇرىلعان. ولار اۋىلدىق وكرۋگ، كەنت اكىمدەرىنىڭ قىزمەتتىك كولىكتەرىن مەديتسينا قىمەتىنە جاراتىپ، ۇيمە-ءۇي ارالاپ ەمدەۋ شاراسىن جالعاستىرىپ وتىر.

 

"The Qazaq Times"