يراك. ۇكىمەت ارمياسى. فوتو: centralasian.org

بۇۇ ساراپشىلارى يراك پەن ءسۇرياداعى كءوپ جىلدىق سوعىستا جاسىرىلعان مينالار، قولدان جاسالعان جارىلعىش زاتتار مەن جارىلماعان باسقا دا وق-دءارىلەردى تازالاپ، زارارسىزداندىرۋعا 40-50 جىل ۋاقىت پەن ميللياردتاعان دوللار قارجى كەتەتىنىن مءالىمدەدى دەپ جازادى "ورتالىق ازيا حابار قىزمەتى".

بۇۇ-نىڭ مينادان تازارتۋ قىزمەتىنىڭ ديرەكتورى اگنەس ماركايۋدىڭ ايتۋىنشا، سوعىس شارپىعان ەكى ەلدى ەكىنشى دۇنيەجۇزىلىك سوعىستان كەيىنگى ەۋروپا سياقتى جاساۋ ءۇشىن ونداعان جىل ۋاقىت قاجەت. بۇل تۋرالى ول 4 ساۋىردە حالىقارالىق مينا قاۋپىنەن حاباردار ەتۋ كۇنىنە وراي وتكەن ءباسپاسوز كونفەرەنتسياسىندا ايتتى.

ماركايۋ يراكتاعى "يسلام مەملەكەتى" ەكسترەميستىك ۇيىمىنان قايتارىپ الىنعان تەرريتوريالاردى مينا، قارۋ-جاراق پەن جارىلعىش زاتتاردان تازارتۋ ءۇشىن جىلىنا 180 ميلليون دوللار، ونىڭ ىشىندە تەك موسۋل قالاسىنىڭ وزىندە وسىنداي جۇمىستار جۇرگىزۋگە جىلىنا 50 ميلليون دوللار جۇمساۋ كەرەك دەگەن بولجامىن ايتتى.

"ەكىنشى دۇنيەجۇزىلىك سوعىستان كەيىن فرانتسۋزدار، نەمىستەر مەن بريتاندىقتاردىڭ ءوز جەرىن ءوزى تازالاعانى سياقتى يراك ۇكىمەتىنە دە ءوز پروبلەماسىمەن ءوزىنىڭ اينالىسۋىنا مۇمكىندىك بەرۋ قاجەت" دەدى ماركايۋ. ول سونىمەن قاتار سيريا تەرريتورياسىن قايتادان قاۋىپسىز ەتۋ ءۇشىن "وراسان زور كۇش قاجەتىن", بىراق ونىڭ قارجى تابىلعاندا عانا جۇزەگە اساتىنىن ايتتى.

“The Qazaq Times”