الەمدىك اقپارات قۇرالدارىنداعى ەڭ نەگىزگى تاقىرىپقا اينالعان قىتايدان باستاۋ العان COVID-19, بۇگىنگە دەيىن الەم ەكونوميكاسىنىڭ العا سۇيرەۋشى بولىپ كەلگەن مۇناي باعاسىنىڭ ەڭ تومەنگى شەتكتەن دە قۇلدىراپ كەتۋىمەن بىرگە كورەي كحدر-نىڭ دارا بيلەۋشىسى، سالىستىرمالى تۇردە بولسا دا بەيبىت الەمدى ارا كىدىك يادرولىق قارۋىمەن قوپاقتاتىپ وتىراتىن كيم جوڭ-ءۋننىڭ(Kim Jong-un) جاعدايىدا كەڭىنەن تالقىلانىپ جاتىر.

بۇعان دەيىن وڭتۇستىك كورەيالىق Daily NK باسىلىمىنىڭ سولتۇستىكتەگى كورشىلەرىنىڭ ەڭ جوعارعى باسشىسىنىڭ جۇرەگىنە وتا جاسالعانى تۋرالى حابار مەن قوسا 11 ساۋىردەن بەرى جۇرت كوزىنەن تاسا بولۋىنىڭ ۇستىنە 15 ساۋىردەگى سولتۇستىك كورەي ەلىنىڭ ەڭ ۇلكەن مەرەكەسىنىڭ ءبىرى اتاسى كيم يل-ساڭنىڭ(Kim Il-Sung) تۋعان كۇنىنە ارنالعان مەرەكەگە قاتىسپاۋى جۇرت كۇدىگىن كۇشەيتىپ جىبەردى.

كوپتەن بەرى جۇرت الدىنا شىقپاي كەتكەن جاس ديكتاتور تۋرالى الەم جەلىنى قاپتاعان قاۋەسەت تىپتەن ونىڭ مۇراگەرىندە سايلاپ ۇلگەردى. ايتىلۋىنشا ونىڭ ورنىن بىرگە تۋعان قارىنداسى كيم يو-جوڭ(Kim Yo-jong) كەلۋى مۇمكىن. ال كيم جوڭ-ءۋننىڭ سەگىز جاسار قىزى كيم جۋ-انى (Kim Ju-ae) تاق مۇراگەرى دەپ جاتقاندار دا بار.

بۇلاردان تىس كيم جوڭ-ءۋننىڭ بىرگە تۋىسقان، اكەسى كيم جوڭ-ءيلدىڭ تۇسىندا لاۋازىمدى قىزمەتتەر اتقارعان اپكەسى كيم سول-سوڭ(Kim Sol-song) مەن تۋعان اعاسى كيم جوڭ-ءچۋلدىڭ (Kim Jong-chul) مۇمكىندىگى تۋرالى ازىرگە ەشنارسە ايتىلعان جوق.

كيم جون ۋننىڭ دەنساۋلىعى، تىپتەن ءولى-ءتىرى ەكەندىگى بۇكىل الەمدە تالقىلاۋعا تۇسكەنىمەن سولتۇستىك كورەيا اقپارات قۇرالدارى ەڭ جوعارعى باسشىسى تۋرالى رەاكتسيا بىلدىرگەن جوق. Reuters اقپارات اگەنتتىگى قىتايدىڭ ءبىر توپ بىلىكتى دارىگەرلەر دەلەگاتسياسىنىڭ سولتۇستىك كورەيگە بارۋىن كيمنىڭ دەنساۋلىعى تۋرالى كەڭەس بەرىپ، ونىڭ جۇرەگىنە وتا جاساتقانىن بىلدىرەدى دەپ توپشىلايدى. سونداي-اق، جەرسەرىكتىك سۋرەتتەردە ونىڭ جەكە پويىزى جاعالاۋداعى ۆونسان كۋرورتتىق ايماعىنان كورىنگەنىن انىقتاعان.

قالاي بولعاندا دا الدىعى ۋاقىتتا پەكتۋسان تاۋىنان اقبوز اتتى ديكتاتوردىڭ ءوزىن، بولماسا تۋعان قارىنداسىن كورۋىمىز بەك مۇمكىن. ءبىر انىعى سەگىز جاسار قىزىن مۇراگەر رەتىندە جۋىق ارادا كورە قالماسىمىز انىق. سونداي-اق الداعى ءبىراز ۋاقىتقا دەيىن چوسون ەلىنىڭ سىرتقا قاراتا باعىتتاپ قويعان وق تۇمسىقتارىدا جينالا قويۋى ەكىتالاي.

"The Qazaq Times"