فوتو: AP Photo/ Cliff Owen اقش سەناتورى

اقش سەناتىنىڭ وتىرىسىندا رەسەي فەدەراتسياسىنىڭ گەرمانيا مەن فرانتسياداعى سايلاۋعا ارالاسىپ, ءوز مۇددەسىنە وراي شەشىم شىعۋىنا ارەكەت ەتىپ وتىرعاندىعى جايلى ايتىلدى. بۇل تۋرالى NBC ارناسىنىڭ ەفيرىندە دەموكراتيالىق پارتيانىڭ جانە سەناتتىڭ بارلاۋ كوميتەتىنىڭ وكىلى مارك ۋورنەر مالىمدەدى. 

امەريكالىق سەناتور اقش-تا وتكەن سايلاۋعا دا "جالدامالى حاككەرلىك شابۋىلدارى" ارقىلى رەسەيدىڭ "ارالاسقاندىعىن"  ەسىنە الدى.

ۋورنەر: "سايلاۋ كەزىندە  رف-نىڭ سايلاۋعا قاتىسى بار ەكەندىگىن بىلەمىز جانە ول فرانتسيا مەن گەرمانياعا دا ءدال سول ارەكەتىن قايتالاماق" - دەپ، اتاپ ءوتتى.

ال رەسەي ۇكىمەتى بولسا، وزگە مەملەكەتتەردىڭ ىسىنە قاتىسى جوق ەكەندىكتەرىن ايتىپ، ەش ارالاسپاعاندىقتارىن العا تارتۋدا.

 وسى ۋاقىتقا دەيىن گەرمانيانىڭ فەدەرالدىق بارلاۋ قىزمەتىنىڭ باسشىسى  (BND) برۋنو كال رەسەيدىڭ ەلدەگى سايلاۋ ناۋقانىنا ارالاسىپ، رەسەيلىك حاككەرلەردىڭ نەمىس بۋندەستاگىنىڭ سەرۆەرىنە شابۋىل جاساپ وتىرعاندىعىن ايتقان بولاتىن.

“The Qazaq Times”