بۇگىن تۇركيا پرەزيدەنتى رەجەپ تايىپ ەردوعان مەن رەسەي پرەزيدەنتى ۆلاديمير پۋتين سوچيدە كەزدەسەدى. بۇدان بۇرىن ەردوعان سۇرياداعى كۇرد قارۋلى كۇشتەرى ۋاقىتشا سوعىس توقتاتۋ كەلىسىمىن تولىق ورىنداماسا، سەيسەنبى كۇننەن باستاپ شابۋىل قايتا جالعاساتىنىن ەسكەرتكەن بولاتىن.

ۋاقىتشا سوعىس توقتاتۋ ءبىتىمى وتكەن اپتادا جاريالانعانى بەلگىلى. ۆيتسە-پرەزيدەنت مايك پەنس باستاپ بارعان اقش دەلەگاتسياسى انكارادان 5 كۇنگە شابۋىلدى توقتاتا تۇرۋ كەلىسىمىن العان بولاتىن. 5 كۇن ىشىندە كۇرد قارۋلى كۇشتەرىنىڭ تۇركيا جوسپارلاعان قاۋىپسىز ايماقتان شىعىپ كەتۋىن تالاپ ەتكەن. كۇرد كۇشتەرى اتالعان ايماقتان شىعىپ كەتەتىن بولسا، انكارا شابۋىلدى جاساماۋعا كەلىسكەن.

اقش پەن ەو تۇركيانى كۇرد كۇشتەرىمەن كەلىسسوز جۇرگىزۋگە ناسيحاتتاپ كەلەدى. وتكەن جۇمادا حالىقارالىق ۇيىمدار مالىمدەمە جاساپ، تۇركيانىڭ سۇرياداعى اسكەري ارەكەتتەرىنەن 86 بەيبىت تۇرعىننىڭ قازا تاپقانىن مالىمدەگەن ەدى. تۇركيانىڭ شابۋىلى باستالعاننان بەرى 160 مىڭ سۇريالىق تۇرعىن بوسقىنعا اينالعانى دا ايتىلۋدا.

كەيبىر حالىقارالىق ۇيىمدار شابۋىل كەزىندە تۇركيا تارابى اسكەري قىلمىسقا دا جول بەردى دەپ كۇدىكتەنەدى. ايتالىق، Amnesty International ۇيىمى تۇركيا قارۋلى كۇشتەرى كەيبىر قاقتىعىس ايماعىندا حيميالىق قارۋ قولدانىن دالەلدەي الامىز دەپ شىقتى. بۇۇ انكارادان بۇل تۋرالى تۇسىنىك بەرۋىن تالاپ ەتكەن.

“The Qazaq Times”