پەنتاگون ساۋد ارابياسىنداعى اسكەرلەردى كۇشەيتكەنىن راستادى. فوتو: Forces Network

يراننىڭ اگرەسسيالىق قادامدارىن توقتاتۋ ماقساتىندا اقش ساۋد ارابياسىنا اسكەرلەرىن اتتاندىرۋدا. وتكەن اپتا سوڭىندا پەنتاگون باسشىسى رەسمي مالىمدەمە جاساپ، ەكى جاۋىنگەرلىك ۇشاقتى قوسىنىن قامتىعان، «پاتريوت» زىمىران باتارەيالارى مەن «ساد» جۇيەسى جانە ونى قولداۋشى پەرسونال ساۋد ارابياسىنا اتتانعانىن جەتكىزگەن.

اقش-تىڭ يرانداعى ارنايى وكىلى جانە اقش مەملەكەتتىك حاتشىسىنىڭ يران ءىسى جونىندەگى كەڭەسشىسى براين حۋك بۇل تۋرالى سوزىندە: «ساۋد ارابياسى اقش-تىڭ ۇزاق مەرزىمدى قاۋىپسىزدىك بويىنشا سەرىكتەسى. ورتاق ەرەجەلەر مەن حالىقارالىق ءتارتىپتى قورعاۋ ءۇشىن بىزدەن قورعانىس جاعىندا كومەك تالاپ ەتىپ وتىر. بۇل رەتكى قولداۋ كورسەتۋ ايماقتاعى قاۋىپسىزدىك پەن تۇراقتىلىقتى قورعاۋعا تىكەلەي قاتىستى»، – دەگەن. ول جانە امەريكالىق قارۋلى كۇشتەر مەن قورعانىس تەحنيكالارىنىڭ اراب تۇبەگىنە ورنالاسقانىن تۇبەك ماڭىنداعى اراب ەلدەرى دە قولداپ وتىرعانىن قوسا ايتتى.

اقش-تىڭ يران ماڭىنداعى اسكەري جانە اۋە بازالارى. 2012, فوتو: Forces Network

وتكەن ايدا ساۋد ارابياسىنىڭ مۇناي نىساندارىنا شابۋىل جاسالىپ، ەلدىڭ مۇناي ءوندىرىسى 50 پايىزعا دەيىن قىسقارعان ەدى. اقش شابۋىلعا بايلانىستى تەھراندى ايىپتادى. ءارى، زىمىراندار مەن ۇشقىشسىز ۇشۋ قۇرىلعىلارى يراننىڭ وڭتۇستىك-باتىسىنان ۇشىپ كەلدى دەپ كورسەتتى. وسىعان بايلانىستى اقش اراب جەرىنە 3 مىڭ قارۋلى جاساعىن اتتاندىرعان. بىراق، تەھران وزىنە تاعىلعان ايىپتى جوققا شىعاردى.

پەنتاگوننىڭ مالىمدەۋىنشە مامىر ايىنان بەرى وسى ايماققا جىبەرىلگەن امەريكالىق ساربازداردىڭ سانى 14 مىڭعا جەتكەن. بۇلار ءتورت رەتكى مۇناي تانكەرىنە جاسالعان شابۋىل كەزىندە جىبەرىلگەن اسكەرلەردى دە ءوز ىشىنە قامتيدى. بۇل قارۋلى كۇشتەر اۋە شابۋىلدارىنان الدىن-الا مالىمەت بەرە الاتىن اۆياتسيالىق ەسكادريليا، تەڭىز پاترۋلدىك اۆياتسيا ەسكادريلياسى، Patriot زىمىران باتارەيالارى، B-52 بومبالاۋشى ۇشاعى، ۇشاق تاسىمالداۋشى كەمەنىڭ شابۋىلشى كوماندالارى، سونداي-اق، امفيبيالىق كولىك تەرمينالدارى جانە دروندارمەن كۇشەيتىلگەن.

پەنتاگون سونداي-اق، قۇراما شتاتتىڭ بارلىق اسكەري اۋە جانە تەڭىز كۇشتەرىنە، تەڭىز كۇشتەرىنىڭ قۇرىلىق قوسىندارىنا قاجەت بولعان جاعدايدا وسى ايماقتاعى قارۋلى كۇشتەرگە كومەك بەرۋگە بۇيىرعان.

“The Qazaq Times”