وزبەكستان قارجى مينيسترلىگى ەكس-پرەزيدەنت يسلام كارىموۆتىڭ قىزى گۇلنارا كارىموۆانىڭ مەملەكەتكە 1,2 ميلليارد دوللار اۋدارعانى تۋرالى اقپاراتتى جوققا شىعاردى. گۇلنارا كارىموۆا قازىرگى تاڭدا ەكونوميكالىق قىلمىستارى ءۇشىن تاشكەنت وبلىسىنداعى ايەلدەر كولونياسىندا جازاسىن وتەۋدە. بۇل تۋرالى مينيسترلىك Facebook پاراقشاسىندا رەسمي مالىمدەمە جاسادى.
"وتكەن جىلى دا جانە بيىلعى جىلدىڭ ءبىرىنشى جارتىسىندا دا بيۋدجەتكە گۇلنارا كارىموۆادان جوعارىدا كورسەتىلگەن سوما تۇسپەدى", دەلىنگەن حابارلامادا.
گۋلنارا كارىموۆانىڭ 1,2 ميلليارد دوللاردى مەملەكەتتىك شوتقا اۋدارىلعانى تۋرالى اقپارات 23 ماۋسىمدا تاراعان بولاتىن. ونىڭ اتىنان Instagram-دا Gulnarakarimovaupdates پاراقشاسىندا (اككاۋنت قازىرگى ۋاقىتتا وشىرىلگەن) جازبا پايدى بولدى. اتالعان جازبادا گۇلنارا كارىموۆا ءوزىن قولداعان ادامدارعا راحمەت ايتىپ، ءارى كەشىرىم سۇراعان. سونداي-اق، ونىڭ ايتۋىنشا، ول قۇقىق قورعاۋ ورگاندارىمەن ىنتىماقتاستىقتا جۇمىس ىستەپ، ونىڭ اكتيۆتەرىنىڭ بەلگىلى ءبىر بولىگى، ياعني 1,2 ميليارد دوللار قارجى مەملەكەتتىك بيۋدجەتكە اۋدارىلعان.
ايتا كەتەيىك، گۇلنارا كارىموۆانىڭ ۇستىنەن قىلمىستىق ءىس 2015 جىلى قوزعالدى. ءدال وسى جىلى تاشكەنت قالالىق سوتى ونى "اسا ءىرى كولەمدە قارجى جىمقىرۋ", "بوپسالاۋ", "سالىقتان جالتارۋ" ايىپتارى بويىنشا كىنالى دەپ تانىپ، بەس جىلعا باس بوستاندىعىنان ايىرعان. 2017 جىلى شىلدەدە وزبەكستان باس پروكۋراتۋراسى گۇلنارا كارىموۆانىڭ ۇستىنەن تاعى بىرنەشە قىلمىس بويىنشا ءىس قوزعالعاندىعىن مالىمدەدى. وزبەكستان رەسمي ورگاندارىنىڭ مالىمدەمەسىنەن كەيىن وعان تيەسىلى الەمنىڭ 12 ەلىندەگى بانك شوتتارى مەن جىلجىمايتىن مۇلىكتەرى بۇعاتتالعان. كارىموۆاعا قارسى ەكى قىلمىستىق ءىس بويىنشا مەملەكەتكە كەلتىرىلگەن زالالدىڭ جالپى سوماسى 2 ملرد دوللار.
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى