بريتاندىق باق: زەلەنسكي ءپۋتيننىڭ تۇزاعىنا ءتۇسىپ قالۋى مۇمكىن

كەشە، 21 ساۋىردە ۋكراينادا پرەزيدەنتتىك سايلاۋ وتكەنى بەلگىلى.  بۇكىل الەمنىڭ نازارىن اۋدارتقان سايلاۋدا شوۋمەن ۆلاديمير زەلەنسكي  73,18 پايىز داۋىس جيناپ، جەڭىسكە جەتكەن ەدى. وسى ورايدا، بۇگىن بريتاندىق گازەتتەر ۋكراينادا كەشەگى وتكەن سايلاۋدى قورىتىندىلاپ، ۋكراينالىق ساياساتتانۋشىلار مەن جاڭا پرەزيدەنت كامپانياسىنىڭ وكىلدەرىنەن  زەلەنسكيدىڭ الداعى جوسپارلارى مەن ۋكراينانى نە كۇتىپ تۇرعاندىعى جايىندا العان سۇحباتىن جاريالادى.

Times گازەتىنىڭ جازۋىنشا، جاڭا پرەزيدەنت زەلەنسكيدىڭ تۇسىندا ۋكراينا باتىسقا جاقىنداي تۇسەدى. ياعني، اقش، ۇلىبريتانيا جانە باسقا دا ەۋروپالىق ەلدەرمەن بايلانىسىن ودان ءارى نىعايتا تۇسپەك.

سونداي-اق، اتالعان گازەت بۇعان دەيىن زەلەنسكيدىڭ ماسكەۋمەن قانداي دا ءبىر بايلانىسى بار ەكەندىگىن دالەلەدەيتىن اقپاراتتىڭ جارىققا شىقپاعانىن دا اتاپ وتكەن.

ال، زەلەنسكي كامپانياسىنىڭ جەتەكشىسى يۆان باكانوۆ اتالعان گازەتكە بەرگەن سۇحباتىندا، امەريكالىق ششەنەۋنىكتەر جاڭا بيلىك جەمقورلىقپەن كۇرەسىپ، وڭ ناتيجە كورسەتكەن جاعدايدا حالىقارالىق قولداۋعا يە بولاتىنىن ايتقان. يۆان باكانوۆ وسىدان ءۇش اپتا بۇرىن اقش-تا بولىپ، امەريكالىق شەنەۋنىكتەرمەن كەزدەسكەن ەدى.

سونداي-اق، زەلەنسكي سايلاۋ شتابىنىڭ وكىلى دميتري رازۋمكوۆ جاڭا پرەزيدەنتتىڭ ەو پەن ناتو-عا مۇشە بولۋعا رەفەرەندۋم وتكىزبەكشى ەكەندىگىن جەتكىزگەن. سونىمەن بىرگە، ونىڭ ايتۋىنشا، ۋكراينانىڭ كرەملمەن جۇمىس ىستەمەۋى مۇمكىن ەمەس. الايدا، كيەۆ اقش پەن ۇلىبريتانيانىڭ "نورمان تورتتىگىنە" قوسىلۋىن سۇرايتىن  بولادى. بۇعان البەتتە ماسكەۋ تاراپى قارسى بولماق، دەدى ول. "ەگەر وسىعان دەيىن الەم رەسەيدىڭ قالاۋىن جاساعان بولسا، بۇگىنگى كۇنى ونىڭ تانكىلەرى لا-مانش-تا تۇرۋشى ەدى",- دەپ قورتىندىلادى ول Times-قا بەرگەن سۇحباتىن.

ال، ءوز كەزەگىندە ۋكراينالىق ساياساتتانۋشى ۆلاديمير فەسەنكو Times گازەتىنە بەرگەن پىكىرىندە، ماسكەۋمەن بايلانىس ەمەس، جاڭا پرەزيەدەنتتىڭ ساياساتتاعى تاجىريبەسىزدىگى پروبلەما بولۋى مۇمكىن ەكەنىن ايقان. ول: "ساياساتتاعى تاجىريبەسىزدىگىنەن زەلەنسكي ءپۋتيننىڭ تۇزاقتارىنا ءتۇسىپ قالۋى بەك مۇمكىن"دەپ الاڭداۋشىلىق ءبىلدىردى.

ال، "Daily Telegraph" گازەتىنە بەرگەن سۇحباتىندا پەتر پوروشەنكونىڭ پرەزيدەنتتىك سايلاۋدىڭ ەكىنشى اينالىمىندا جەڭىسكە جەتە المايتىنىن بىلگەندىگىن، سونداي-اق، ونىڭ بيىلعى جىلدىڭ قازان ايىندا وتەتىن پارلامەنتتىك سايلاۋعا قاتىسىپ، كەك الماقشى ەكەنىن اتاپ وتكەن.

"The Qazaq Times"