ۆەنەسۋەلاداعى توڭكەرىس: قىتاي بيلىگى مادۋرونى قولداپ شىقتى

ۆەنەسۋەلا ماسەلەسى بويىنشا قىتاي سىرتقى ىستەر مينيسترلىگى ارنايى مالىمدەمە جاسادى. قىتاي ءسىم وكىلى حۋا ءچۇنيىڭ جۋرناليستەرگە بەرگەن جاۋابىندا: «ۆەنەسۋەلانىڭ ەگەمەندىگىن، ۇلتتىق تۇتاستىعىن جانە تۇراقتىلىعىن قولدايمىز»، – دەدى.

«قىتاي تارابى ۆەنەسۋەلا ۇكىمەتىنىڭ ەلدەگى تۇراقتىلىق پەن قاۋىپسىزدىكتى ساقتاۋ ماقساتىنداعى ارەكەتتەرىن قولدايدى. ۆەنەسۋەلاعا باعىتتالعان قانداي دا ءبىر سىرتقى كۇشتەردىڭ ارەكەتتەرىنە قارسى تۇرادى»، – دەدى حۋا ءچۇنيڭ حانىم.

وسىدان بىرەر كۇن بۇرىن ۆەنەسۋەلا پرەزيدەنتى نيكولاس مادۋرو الەۋمەتتىك جەلى ارقىلى مالىمدەمە جاساپ، ەلدە ساياسي توڭكەرىس قاۋپىنىڭ بار ەكەنىن ايتقان. بۇعان دەيىن ۇلتتىق ءماجىلىس توراعاسى بولىپ كەلگەن حۋان گۋايدو ءوزىن «ۋاقىتشا ۇكىمەتتىڭ باسشىسى» دەپ جاريالادى. ەل پرەزيدەنتى مادۋرو ەل ازاماتتارىنا ۇندەۋ تاستاپ، رەۆوليۋتسيا جاساماۋعا شاقىرعان، ءارى بۇل ىسكە بايلانىستى قۇراما شتاتتاردى ايىپتاعان بولاتىن. نيكولاس «تۆيتتەر» پاراقشاسىندا: «ۆەنەسۋەلانىڭ باتىل ازاماتتارىن شەتەلدىك كيلىگۋگە جانە سودىرلىق ارەكەتتەرگە قارسى اتتانىسقا شاقىرامىن»، – دەگەن بولاتىن.

ەلدەگى جاعدايعا بايلانىستى رەسەي، مەكسيكا، قىتاي، بوليۆيا ەلدەرى پرەزيدەنت نيكولاس مادۋرونىڭ بيلىگىن قولدايتىنىن بىلدىرگەن.

“The Qazaq Times”