«بيبليا» كىتابىن ءبىلىم ورداسىندا تاراتقاندار سوتقا تارتىلماق

«قازاق-گەرمان-امەريكاندىق بيبليا ميسcياسى» قوعامدىق بىرلەستىگى الماتى وبلىسىنىڭ ەڭبەكشىقازاق اۋدانى قىربالتاباي اۋىلىنداعى ى.التىنسارين اتىنداعى مەكتەپتىڭ جانىنداعى ينتەرناتپەن دەمەۋشىلىكتى سىلتاۋ ەتىپ، ەرەكشە بايلانىس ورناتقان. وسى ماسەلە توڭىرەىندە بۇگىن الماتى قالاسىندا ءباسپاسوز-كونفەرەنتسياسى ءوتتى.

قوعامدىق قور بيىل حريستياندىق-پروتەستانتتىق ءدىني اعىم سانالاتىن باپتيستەردىڭ ورىس تىلىندەگى «بيبليا» كىتابى مەن وزگە ءدىني ماتەريالدارىن بالالارعا سىيلىق رەتىندە تاراتقان. ال بىلتىر ولار مۇنداعى 120 بالاعا ونىڭ قازاق تىلىندەگى نۇسقاسىن  بەرگەن كورىنەدى. الايدا وبلىستىق، اۋداندىق اكىمدىكتەر مەن ونىڭ ءبىلىم ءبولىمىنىڭ باسشىلارى بۇل جاعدايدان وسى ۋاقىتقا دەيىن حابارسىز بولىپ كەلگەنى ەندى عانا ءمالىم بولىپ وتىر.

ءبىر قىزىعى، الەۋمەتتىك جەلى ارقىلى جەتكەن حابارعا بىردەن كوڭىل ءبولىپ، وزدەرىنىڭ كىناسىز ەكەندىكتەرىن كورسەتپەك بولعان «قازاق-گەرمان-امەريكاندىق بيبليا ميسcياسى» قوعامدىق بىرلەستىگىنىڭ مۇشەلەرى وقيعانىڭ ءمان-جايىن وزدەرىنشە جەتكىزبەك بولدى. 1997 جىلدان بەرى اتالعان ينتەرناتقا قول ۇشىن بەرىپ، بالالارعا ءتۇرلى سىيلىقتار تاراتۋدان باسقا، عيماراتقا دا دەمەۋشىلىك جاساعان. كىتاپ تاراتىلۋىنىڭ زاڭسىز ەكەندىگىن العا تارتىپ، مۇنداي شارۋامەن اينالىسپاعاندارىن ايتىپ سەندىرمەك بولدى.

بىراق، وسى ماسەلەنى كوتەرىپ، ۇيتقى بولىپ وتىرعان قوعام بەلسەندىسى گوزەل قۇلجاباەۆا ەكىنشى تاراپىمەن كەلىسپەي وتىر. سەبەبى، قىربالتابايداعى مەكتەپ ينتەرناتىنىڭ بالالارى بۇل كىتاپتاردى سوڭعى ەكى جىلدىڭ وزىندە سىيلىققا الىپ وتىرعاندىقتارىن اشىق ايتقان. سول سەكىلدى، ءتۇرلى ءدىني شارالاردىڭ دا وتكەندىگىن جاسىرماعان.

بۇدان بولەك، ۇزاق جىلدان بەرى جالعاسىپ كەلە جاتقان جاعدايدى اشىپ ايتۋعا اتا-انالاردىڭ جۇرەگى داۋالاماعان ەكەن. «اش پالەدەن قاش پالە» دەگەندەي، ۇل-قىزدارىنىڭ ءبىلىم ورداسىنان شىعىپ قالۋىنان سەكەم العان تۇرعىندار، وسى كۇنگە دەيىن نە اكىمشىلىككە نەمەسە قۇزىرلى ورىندارعا ءتىس جارماپتى.

ءباسپاسوز-كونفەرەنتسياسىنا جۋرناليستەردەن بولەك، ءبىلىم ءبولىمىنىڭ، ءدىني وكىلدىكتىڭ ماماندارىن شاقىرىلعان. الايدا، توبە كورسەتۋدەن قاشقاقتادى ما بەلگىسىز، ايتەۋىر  جيىنعا كەلمەدى.

بارلىق قويىلعان سۇراقتارعا جاۋاپ بەرۋگە تىرىسقان گوزەل قۇلجاباەۆا: «قىربالتابايداعى بۇل ينتەرناتپەن 1997 جىلدان بەرى قارىم-قاتىناس ورناتقان بۇل «جومارت» جانداردىڭ رەسپۋبليكانى بىلاي قويعاندا وبلىس پەن اۋداندارداعى وزگە ءبىلىم بەرۋ ۇيىمدارىمەن دە بايلانىس ورناتۋى ابدەن مۇمكىن. ەندەشە ولاردا دا مۇنداي جاعدايدىڭ ورىن الماعانىنا ەشكىم دە كەپىلدىك بەرە المايدى. سول سەبەپتى بۇل ماسەلەگە بۇكىل جۇرتشىلىق بولىپ ءۇن قوسىپ، ءدىني اعىمداردىڭ جاس ۇرپاقتىڭ ساناسىن ۋلاۋىنا توسقاۋىل قويۋمىز قاجەت. ماسەلەن، ءبىر عانا ەڭبەكشىقازاق اۋدانىنداعى مەملەكەتتىك 85 مەكتەپتەگى وقۋشىلار كونتينگەتىنىڭ سانى – 47 462.  ونىڭ تورتەۋى باستاۋىش، 8-ءى نەگىزگى، 73-ءى ورتا مەكتەپ. ولاردىڭ 33-ءى قازاق، 47-ءسى ارالاس مەكتەپ» دەپ، بۇل ءىستى سوڭىنا دەيىن جەتكىزۋگە شاقىردى.

تۇرمىسى ناشار جانداردىڭ بالالارىنا قول ۇشىن بەرمەك بولعان قوعامدىق بىرلەستىكتىڭ تۇپكى ماقساتى قانداي ەكەندىگى ازىرگە بەلىسىز. الايدا، مۇسىلمان ءدىنىن ۇستاناتىن مەكتەپ ينتەرناتىنىڭ وقۋشىلارىنا «بيبليا» كىتابىن تاراتۋ،  جاقسىلىقتىڭ نىشانى ەمەس ەكەندىگى بەلگىلى. ەندى ءىستىڭ ارى قاراي قالاي اياقتالاتىنىن ۋاقىت كورسەتەر...

"The Qazaq Times"