تۇرىك اۋە كۇشتەرىنە تيەسىلى سوعىس ۇشاقتارى. فوتو: al-Abaja.

تۇركيا اۋە كۇشتەرىنىڭ يراك جەرىندەگى اۋە وپەراتسيالارى ءالى تولاستامادى. تۇرىك اقپارات قۇرالدارىنىڭ مالىمدەۋىنشە، يراك سولتۇستىگىندەگى تۇركيالىق اۋە كۇشتەرىنىڭ شابۋىلدارى اپتاسىنا 2 رەت جاسالادى. سوڭعى اۋە وپەراتسياسى وسىدان ءبىر كۇنى بۇرىن كانديل جانە مەتينا ايماقتارىندا جاسالدى.

تۇركيا اۋە كۇشتەرى وپەراتسيادان كەيىن مالىمدەمە جاساپ، كەزەكتى اۋە وپەراتسيالارىنىڭ اتالعان ايماقتاعى قارۋلى تەررورلىق توپتارعا، ولاردىڭ قارۋ-جاراق قويمالارى مەن بەكىنىستەرىنە باعىتتالعانىن، شابۋىلدا تەررورلىق توپتىڭ 5 سودىرىن ولتىرگەنىن ايتتى.

تۇرىك اۋە كۇشتەرىنىڭ بۇدان بۇرىنعى شابۋىلى 19 قاراشادا جاسالعان بولاتىن. وندا كانديلدەن تىس اۆاشين-باسيان، حافتانين ايماقتارى نىساناعا الىنعان. سول رەتتە تۇركيا قولباسشىلىق باس شتابى ارنايى مالىمدەمە جاساپ، وپەراتسيادا 14 تەرروريستى جويعانىن ايتقان.

يراكتىڭ سولتۇستىگىندەگى موسۋل قالاسىنا جاقىن ايماقتارداعى بەكىنىستەردىڭ كوبى كۇرد قارۋلى توپتارىنا تيەسىلى. ءسۇريا جانە تۇركياعا شەكارالاس تاۋلى ايماقتاردا كۇرد قارۋلى توپتارى انكارا بيلىگىن قاتتى الاڭداتادى.

“The Qazaq Times”