اقش-تىڭ يراندىق جانە رەسەيلىك كومپانيالارعا، سونىمەن قاتار جەكە تۇلعالارعا قارسى جاقىندا عانا سالعان سانكتسياسىنا بايلانىستى تەگەران ءوز مالىمدەمەسىن جاسادى.

ۆاشينگتون اتالعان ىسكە قاتىسى بار وكىلدەردىڭ بارلىعىنا مۇنايدى زاڭسىز تاسمالدادى دەگەن ايىپ تاعىپ وتىر. الايدا، مۇنداي قاتاڭ زاڭعا يراننىڭ سىرتقى ىستەر مينيسترلىگىنىڭ ءباسپاسوز حاتشىسى بەحرام قاسىم ءوز پىكىرىن ءبىلدىردى.

«اقىلعا قونىمسىز جانە بەدەۋ سانكتسيالاردى  قۇراستىرىپ، كومپانيالار مەن جەكە تۇلعالارعا قىسىم كورسەتكەندەردەر، ەشقاشان ويىنداعى شەشىمگە جەتە المايدى»، دەپ مالىمدەدى.

اقش-تىڭ قارجى مينيسترلىگى جاقىندا عانا رەسەيدىڭ مەملەكەتتىك كورپوراتسياسى مەن يراننىڭ ءتورت ۇيىمىنا جانە بەس جەكە تۇلعاسىنا سانكتسيا جاريالاعان بولاتىن.

5 قاراشا كۇنى اقش ءوزىنىڭ كەزەكتى رەتكى سانكتسيا پاكەتىن يرانعا قارسى جولداعان. وندا ەنەرگەتيكا سالاسى مەن قارجى سەكتورىنا باعىتتالعان. سول سەكىلدى، سانكتسيادا يراندىق مۇناي كومپانيالارىنىڭ حالىقارالىق مۇمكىندىكتەرىنە توسقاۋىل قويىپ، يران بانكتەرىنىڭ حالىقارالىق قارجى ۇيىمدارىنداعى وپەراتسيالاردى ەركىن جۇرگىزۋىنە تيىم سالعان بولاتىن. بۇدان بولەك، يران پورتتارى، تەڭىز تاسمالى دا قارا ءتىزىمنىڭ ىشىنەن تابىلعان.

ەستەرىڭىزگە سالا كەتەيىك، 8 مامىر كۇنى اقش باسشىسى دونالد ترامپ ۆاشينگتوننىڭ يرانمەن جاساعان يادرولىق كەلىسىمنەن شىعاتىندىعىن مالىمدەپ، العاشقى سانكتسياسىن جاريالاعان بولاتىن. بۇدان كەيىن يران بيلىگى 1955 جىلى ەكى ەلدىڭ اراسىنداعى «دوستىق، ەكونوميكالىق بايلانىس جانە كونسۋلدىق زاڭدى» بۇزدى دەپ بۇۇ حالىقارالىق سوتىنا شاعىمدانعان ەدى. الايدا، اقش باسشىسى بۇل ءىستىڭ وزىنە قاتتى ءبىر سوققى بولمايتىندىعىن سەزگەندەي ءۇستى-ۇستىنە سانكتسياسىن جاۋدىرۋدا.

“The Qazaq Times”