فوتو: media.ws

ەۋروپالىق وداق يرانمەن اراداعى يادرولىق كەلىسىمدى بۇزبايتىن بولدى.

بريۋسسەلدە وتكەن ەكونوميكا جانە قارجى ماسەلەسى بويىنشا ەو كەڭەسىندە يادرولىق كەلىسىمگە قاتىستى تاقىرىپتار جان-جاقتى تالقىلانعان. وسى رەتتە ەۋروكوميسسيانىڭ رەسمي وكىلى مارگاريتيس سحيناس: «اتوم ەنەرگياسى بويىنشا حالىقارالىق اگەنتتىك – ماگاتە 12 مارتە دالەلدەگەندەي، يران يادرولىق كەلىسىمنىڭ مىندەتتەمەلەرىن بۇزبايىنشا، ءبىز دە ولاردى بۇلجىتپاي ورىندايتىن بولامىز. ەۋروپالىق وداقتىڭ جانە الەمدىك سەرىكتەستەردىڭ ماقساتى ايقىن»، – دەدى.

جيىن بارىسىندا جاقىن ارادا اتالعان كەلىسىمگە ەشقانداي وزگەرىستەر مەن جاڭارتۋلاردىڭ ەنگىزىلمەيتىنى جانە كەلىسىمگە قاتىستى ورتاق مامىلەلەر جاسالىناتىنى ايتىلدى. ەۋروپالىق وداق ەلدەرى حالىقارالىق سەرىكتەستەرىمەن بىرگە وسى سالاعا بايلانىستى جوسپارلاردى بىرگە جۇزەگە اسىرماق.

"The Qazaq Times"