فوتو: ر.ت.ەردوعان

ەگەر ءسۇريا پرەزيدەنتى باشار اسادتىڭ اسكەرى يدليبكە شابۋىلىن جالعاستىرا بەرەتىن بولسا، بۇكىل الەم وسى ءىستىڭ زاردابىن تارتاتىن بولادى، - دەپ ەسكەرتتى تۇركيا پرەزيدەنتى رەجەپ تايىپ ەردوعان. «The Wall Street Journal» جۋرنالىندا «الەم اسادتى توقتاتۋى كەرەك» دەگەن تۇرىك پرەزيدەنتىنىڭ ماقالاسى جارىق كوردى.

ماقالادا ەردوعان سۇريالىق اسكەريلەردىڭ «تەرروريستەرمەن كۇرەس دەگەن» جەلەۋمەن يدليب شابۋىلىنىڭ سالدارىن ەسكەرتكەن. «حالىقارالىق قاۋىمداستىقتىڭ بارلىق مۇشەلەرى يدليبكە جاسالاتىن شابۋىلعا قاتىستى وزدەرىنىڭ مىندەتتەرىن تۇسىنۋلەرى كەرەك»، - دەپ جازعان ول. رەجيمنىڭ شابۋىلى تۇركيا مەن ەۋروپا ءۇشىن گۋمانيتارلىق قاۋىپ-قاتەرلەر تۋىنداتۋى مۇمكىن.

ەردوعان ماقالاسىندا تۇركيانىڭ سۇريالىق قاقتىعىستاعى ءرولىن اتاپ، تۇرىك ەلىنىڭ سۇريالىق بوسقىنداردىڭ باسىم بولىگىن — 3,5 ملن ادامدى قابىلداعانىن دا جازعان. ونىڭ ايتۋىنشا، تۇركيا قانتوگىستى توقتاتۋ ءۇشىن قولىنان كەلگەننىڭ ءبارىن جاسادى. باتىس، سونىمەن قاتار رەسەي مەن يران ايماقتاعى گۋمانيتارلىق اپاتتان جاۋاپتى. تۇركيا پرەزيدەنتى يدليبتە ناقتى ءبىر تەررورلىق توپتار بار ەكەنىن مالىمدەي كەلە، ول جەردەگى ەكسترەميستەردى ءتۇپ-تامىرىمەن جويۋ ءۇشىن «جالپىعا ورتاق حالىقارالىق كونترتەرروريستتىك وپەراتسياعا» شاقىرعان.

“The Qazaq Times”