وڭتۇستىك كورەياداعى اقش اسكەرى ترامپ-كيم كەلىسسوزىنە باعىنبايدى

رەيتەر اگەنتتىگىنىڭ حابارلاۋىنشا، وڭتۇستىك كورەيا پرەزيدەنت سارايىنىڭ وكىلى كەشە جاساعان مالىمدەمەسىندە، اقش-سولتۇستىك كورەيا اراسىنداعى كەلىسسوزدەر ناتيجەسى، اقش-تىڭ وڭتۇستىك كورەياداعى گارنيزونىنىڭ شىعۋ-شىقپاۋىنا اسەر ەتپەيتىنىن، سەبەبى، بۇل اقش پەن وڭتۇستىك كورەيا اراسىنداعى ماسەلە ەكەنىن ايتقان.

اقش پرەزيدەنتى سينگاپۋرداعى تاريحي كەزدەسۋدەن كەيىن، اقش-وڭتۇستىك كورەيا بىرلەسكەن وقۋ-جاتتىعۋىنىڭ شىعىنداردى ارتتىرمايتىنىن، ارانداتۋ سيپاتىنا جول بەرمەيتىنىن ايتقان.

قازىر وڭتۇستىك كورەيا جەرىندە 28 مىڭ 500 امەريكالىق اسكەر تۇرادى. وڭتۇستىك كورەيا لاۋازىمدىلارى، سوڭعى كەزدە اقش-كورەيا بىرلەسكەن ارمياسى تۋرالى تۇسىنىكتەر مەن ۇستانىمداردىڭ قۇراما شتات جاعىنان ناقتىلانباي كەلە جاتقانىن ايتادى. وڭتۇستىك كورەيا لاۋازىمدىلارى، سەۋل مەن ۋاشينگتون تامىز ايىندا وتەتىن «بوستاندىق ەركىن قورعاۋشىلار» اتتى بىرلەسكەن وقۋ-جاتتىعۋدى توقتاتۋ ماسەلەسىن تالقىلاعان.

وڭتۇستىك كورەيا پرەزيدەنتى ءمۇن جاين مالىمدەمەسىندە، پرەزيدەنت ترامپتىڭ بىرلەسكەن اسكەري جاتتىعۋلاردى توقتاتۋ تۋرالى ۇسىنىسىن قابىلداي الاتىنىن، ءارى بۇل سولتۇستىك كورەيانىڭ يادرولىق قارۋدان باس تارتۋ، اقش-كحدر كەلىسسوزىنىڭ دامۋىنا وڭ اسەرىن بەرەدى دەپ مالىمدەدى.

اقش مەملەكەتتىك حاتشىسى پومپەو وسى اپتادا وڭتۇستىك كورەياعا جاساعان ساپارى كەزىندە، سولتۇستىك كورەيانىڭ يادرولىق قارۋسىزدانۋ پروتسەسى الداعى ەكى جارىم جىل ىشىندە ماڭىزدى قادامدار جاسايدى دەپ ۇمىتتەنەتىنىن ايتتى.

“The Qazaq Times”