فوتو: lemonde.fr

قازىرگى ۋاقىتتا يتاليا مەن مالتا ەلدەرى اراسىنداعى ەگەستىڭ تۋىنداۋىنا سەبەپ بولعان ميگرانتتار ماسەلەسى كوپتەگەن اقپارات قۇرالدارىنىڭ باستى وزەگىنە اينالۋدا. اتالعان ەكى ەلدىڭ ەكەۋى دە ىشىندە 629 ميگرانت بار «Aquarius» گۋمانيتارلىق كەمەسىن قابىلداۋدان باس تارتۋدا. وسى كەمەدەگى ميگرانتتاردىڭ بارلىعى جەرورتا تەڭىزىندە قۇتقارىلعاندار. بۇل تۋرالى فرانتسيالىق «lemonde.fr» اگەنتتىگى حابارلايدى.  

بىرنەشە كۇن ىشىندە جۇزەگە اسىرىلعان التى قۇتقارۋ وپەراتسياسىنىڭ ناتيجەسىندە «Sos Mediterranee» ۇكىمەتتىك نەمەس ۇيىمىنا تيەسىلى «Aquarius» كەمەسىنە 629 ادام الىنعان. ولاردىڭ اراسىندا 123 جەتكىنشەك، 11 بالا جانە جەتى جۇكتى ايەل بار.

بۇعان دەيىنگى اقپارات بويىنشا، سيتسيليا جاعالاۋى ارقىلى يتالياعا بەت العان كەمەنى يتاليا پرەمەر-ءمينيسترى ماتتەو سالۆيني شەكارادان وتكىزبەۋگە بۇيرىق بەرگەن. ال، 10 ماۋسىم كۇنى مالتا ۇكىمەتىنە جەدەلحات جولداعان سالۆيني، ودان قۇتقارىلعان ميگرانتتاردى تاسۋشى كەمەنى قابىلداۋدى ءۇزىلدى-كەسىلدى تالاپ ەتكەن. ساراپشىلاردىڭ ايتۋىنشا، ءسالۆينيدىڭ وسى قادامى يتاليانىڭ زاڭسىز كوشىپ-قونۋشىلارعا قاتىستى ساياساتىن كورسەتەدى. الايدا، مالتا جاعى دا يتاليانىڭ بۇل ۇسىنىسىن كەرى قايتارعان. بۇل جاعداي ەكى ەل اراسىندا كەلىسپەۋشىلىك تۋىنداتۋمەن قاتار، ەۋروپاداعى بوسقىندار ماسەلەسىنىڭ تاعى دا كۇردەلەنە تۇسكەنىن كورسەتەدى. نەگىزىنەن، ءىى دۇنيەجۇزىلىك سوعىستان بەرى ەۋروپا ەڭ ۇلكەن كوشى-قون داعدارىسىن باستان كەشىرىپ وتىر. بۇعان تاياۋ شىعىس پەن افريكا ەلدەرىندەگى ەكونوميكالىق ماسەلەلەر مەن قارۋلى قاقتىعىستار سەبەپ بولۋدا. كوشى-قون جونىندەگى حالىقارالىق ۇيىمنىڭ مالىمەتىنشە، جىل باسىنان بەرى ەۋروپاعا اعىلعان بوسقىندار مەن ميگرانتتاردىڭ سانى 1 ماۋسىم كۇنى 32 مىڭ ادامنان اسقان.

“The Qazaq Times”