تۇركيا ۇكىمەتى كەۋىپ كەتكەن ارال تەڭىزىن كوگالداندىرۋدى قولعا الۋدا

كەۋىپ كەتكەن ارال تەڭىزىنىڭ ورنىندا ميلليونداعان ادامنىڭ ومىرىنە كەرى اسەر ەتەتىن ەكولوگيالىق ايماق پايدا بولعانى بەلگىلى. وسى ماسەلەگە وراي، تاشكەنتتە وتكەن «ارال اپاتىنىڭ سالدارىن ازايتۋعا باعىتتالعان ورتاق قيمىل» كونفەرەنتسياسىندا ورتالىق ازيا ايماقتىق ەكولوگيالىق ورتالىعىنىڭ اتقارۋشى ديرەكتورى ەسكەردىر ابدۋللاەۆ ارالدىڭ كوگالداندىرىلۋ جۇمىستارىنىڭ قولعا الىنعانىن مالىمدەدى، - دەپ حابارلايدى «CA-NEWS» اگەنتتىگى.

ونىڭ سوزىنشە، ورتالىق ازيا ەلدەرى ارال اپاتىنان ساباق الىپ، وسىعان ۇقساس وزگە دە تابيعي اپاتتاردىڭ الدىن الۋلارى كەرەك. اتالعان كونفەرەنتسيا بارىسىندا ءسوز العان تۇرىك رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگى (TIKA) باعدارلاماسىنىڭ ۇيلەستىرۋشىسى ءالي يحسان چاگلار دا ارال تەڭىزىنىڭ تارتىلۋى — تەك ورتالىق ازيانىڭ عانا ەمەس، بۇكىل الەمنىڭ ماسەلەسى ەكەنىن ايتقان. ونىڭ سوزىنشە، تىكا كەۋىپ كەتكەن ارال تەڭىزى حاۋىزىندا ەكولوگيالىق جانە الەۋمەتتىك-ەكونوميكالىق كوپتەگەن جوبالاردى جۇزەگە اسىرادى. وسىعان بايلانىستى 100 گەكتار الاڭدىق ايماقتا كوگالداندىرۋ جۇمىستارى قولعا الىنادى.

ايتا كەتۋ كەرەك، جىل سايىن ارال تەڭىزىنىڭ كەۋىپ كەتكەن اڭعارىنان اۋاعا 100 ميلليون تونناعا جۋىق شاڭ كوتەرىلەدى ەكەن. مامانداردىڭ ايتۋلارىنشا، بۇل — ايماقتا ءتۇرلى اۋرۋدىڭ تارالۋىنا، ەكولوگيالىق، الەۋمەتتىك-ەكونوميكالىق احۋالدىڭ ناشارلاۋىنا اكەپ سوعادى. ەندىگى جەردە، وسى ماسەلەنىڭ بىرىڭعايلانۋىنا باعىتتالعان شارالار تۇرىك رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگى (TIKA) تاراپىنان جۇزەگە اسىرىلماق.

“The Qazaq Times”