فوتو: حريستيا فريلاند

كانادا يمپورتتالاتىن بولات پەن اليۋمينيگە ەنگىزىلگەن سالىققا بايلانىستى اقش-تىڭ ۇستىنەن سولتۇستىك امەريكالىق ەركىن ساۋدا تۋرالى كەلىسىمى (نافتا) مەن دۇنيەجۇزىلىك ساۋدا ۇيىمىنا (دسۇ) ارىز ءتۇسىردى. بۇل تۋرالى france24.com/fr اگەنتتىگى حابارلايدى.

كانادانىڭ سىرتقى ىستەر ءمينيسترى حريستيا فريلاند، اقش ەنگىزگەن  وسى كەدەن سالىعىن «زاڭسىز» دەپ باعالادى. ول: «امەريكانىڭ NORAD (سولتۇستىك امەريكانىڭ اۋە-عارىش قورعانىس قولباسشىلىعى) مەن ناتو-نىڭ ماڭىزدى مۇشەسى رەتىندە جانە امەريكا بولاتتارىنىڭ ەڭ باستى كليەنتى رەتىندە كانادا بولات پەن اليۋمينيگە سالىنعان اقش-تىڭ وسى قىسىمدارىن نەگىزسىز دەپ سانايدى. اقش-تىڭ ۇلتتىق قاۋىپسىزدىگىن قورعاۋ ءۇشىن جالعان نەگىزدەمەلەرمەن جاسالىنعان وسى بىرجاقتى تاريفتەر اقش-تىڭ حالىقارالىق ساۋدا مىندەتتەمەلەرى مەن دسۇ ەرەجەلەرىنە قايشى. كانادا وسى تاريفتەرگە نارازى ەۋروپا وداعى مەن وزگە دە نارازى ەلدەرمەن كۇش بىرىكتىرىپ، شەشىم قابىلدايدى»، - دەدى.

“The Qazaq Times”