وزبەكستان رەسپۋبليكاسىنىڭ نامانگان وبلىسى تۋراكۋرگان اۋدانىنداعى مەكتەپ مۇعالىمدەرى اشىنىپ وتىر. سوزدەرىنشە، اۋدان باسشىلىعى ولاردىڭ ءبىر كۇندىك ەڭبەك اقىلارىن تۇرعىن ءۇي قۇرىلىسىنا سالۋدى تالاپ ەتكەن. جەرگىلىكتى بيلىكتىڭ بۇل تاپسىرماسىن ورىنداماعاندار جاپپاي جۇمىستان قۋىلىپ جاتىر-مىس.

مۇعالىمدەردىڭ ايتۋىنشا، ولار ايىنا 800 مىڭ سۋم (100 اقش دوللارى شاماسىندا) ايلىق الادى ەكەن. مەكتەپ ديرەكتورلارى ءبىلىم وشاقتارىنا  جوندەۋ جۇمىستارىن جۇرگىزۋ ءۇشىن وسىعان دەيىن دە ۇستازداردان اقشا تالاپ ەتىپتى. ەندى، اۋىلداعى نىسانداردىڭ قۇرىلىسىنا دا وقىتۋشىلاردىڭ اقشاسىن جۇمساماق.

29 ناۋرىزدا وزبەكستان پرەزيدەنتى شاۆكات ميرزيەەۆ «وبود كيشلوك» باعدارلاماسى جونىندە قاۋلىعا قول قويدى. جوباعا سايكەس اۋىلدى جەرلەردىڭ ارحيتەكتۋرالىق بەينەسىن تۇبىرىمەن وزگەرتىپ، الەۋمەتتىك نىساندار سالۋ قولعا الىنعان.

“The Qazaq Times”