«يسلام مەملەكەتى» لاڭكەستىك ۇيىمىنا قارسى كۇرەستىڭ ناتيجەلەرى قانداي؟

جاقىن كۇندەرى اقش اسكەرى باستاعان ءسۇريا كۇرد-اراب كۇشتەرى ەر-راككا قالاسىن ءۇش جىلعا سوزىلعان "يسلام مەملەكەتى" لاڭكەستىك ۇيىمىنىڭ بيلىگىنەن ازات ەتتى. حاليفاتتىڭ دە-فاكتو استاناسى سانالاتىن قالاداعى جەڭىس تەرروريستىك ۇيىمعا قارسى كۇرەسكە جاڭا لەپ بەردى. بۇل تۋرالى ۆۆس اقپاراتتىق اگەنتتىگى جازدى. 

ءسۇريانىڭ دەموكراتيالىق كۇشتەرى ەر-راككا قالاسىن ازات ەتۋ وپەراتسياسىن ماۋسىم ايىندا باستاعان. بۇل يراك اسكەرىنىڭ اقش-تىڭ اۋە جانە قۇرلىقتاعى كۇشتەرىنىڭ كومەگىمەن 9 ايعا سوزىلعان قاقتىعىستان كەيىن موسۋل قالاسىن قايتارىپ الۋ ساتىنەن كەيىن بولدى. جۋىردا يراك اسكەرى "يسلام مەملەكەتى" ۇيىمىنا تاعى دا ۇلكەن سوققى بەرىپ، ولاردى ەفرات وزەنىنىڭ باتىس بولىگىندەگى ءشولدى ايماققا ىعىستىردى. اتالعان ۇيىم ءالى دە داير-ءاز-زاۋر قالاسى ماڭىنداعى ۇلكەن اۋماقتى باقىلاۋىندا ۇستاپ وتىرعانىمەن، ونداعى سودىرلار رەسەيدىڭ قولداۋىنا سۇيەنگەن ءسۇريا ۇكىمەتى مەن حەزبوللا، ءسۇريانىڭ دەموكراتيالىق كۇشتەرىنىڭ قىسىمىندا قالىپ وتىر.

ەر-راككا "يسلام مەملەكەتى" 2014 جىلى ءبىرىنشى بولىپ جاۋلاپ العان قالالارىنىڭ ءبىرى. قالانى ازات ەتۋ ءۇشىن 2015 جىلى كۇردتەر مەن اراب توپتارىنان قۇرىلعان ءسۇريانىڭ دەموكراتيالىق كۇشتەرى اقش-تىڭ اۋە كۇشتەرىنىڭ قولداۋىنا سۇيەنىپ، 4 مىڭعا جۋىق بومبى لاقتىرعان.

ادام قۇقىقتارى جونىندەگى The Syrian Observatory ۇيىمىنىڭ ەسەبىنشە، وسىنداي اۋە سوققىلارىنان 3 مىڭ 250 ادام قازا تاپقان. ولاردىڭ اراسىنداعى بەيبىت تۇرعىنداردىڭ سانى - 1 مىڭ 130. بۇۇ 270 مىڭ ازامات ءوز ۇيلەرىن تاستاپ بوسىپ كەتكەنىن ايتادى.

"يسلام مەملەكەتى" لاڭكەستىك ۇيىمى قارجىنى قايدان الادى؟

ولار يراك پەن سۇرياداعى مۇنايلى اۋدانداردى باسىپ الىپ، سونى ساۋدالاپ كەلدى. دەگەنمەن سوڭعى جەڭىلىستەردىڭ اسەرىنەن،  بىراز تابيعي بايلىعى مول اۋدانداردى ۋىسىنان شىعارىپ الدى. ونان بولەك، تەرروريستەردى استىرتىن قارجىلاندىراتىن مەملەكەتتەر مەن ۇيىمدار بار. سودىرلاردىڭ تابىس تابۋ جولدارىنىڭ تاعى ءبىرى - جەرگىلىكتى حالىقتان جينالاتىن سالىق، مۇلىكتى كۇشپەن تارتىپ الۋ جانە ادام ۇرلىعى.

“The Qazaq Times”