ير پرەزيدەنتى حاسان رۋحاني. فوتو: 国际新闻.

اقش-يران اراسىنداعى شيەلەنىس تاعى دا قىزعالى تۇر. اقش پرەزيدەنتىنىڭ يرانعا قاراتا «2015 جىلعى يادرولىق كەلىسىمدى ساقتاعان جوق» دەگەن ايىپتاۋىنا تەھران (تەگەران) تارابى كۇشتى قارسىلىقتارىن توقتاتار ەمەس.

قازىرگى ۋاقىتتا الەم ەلدەرى قۇراما شتاتتىڭ يران كەلىسىمىنەن شىعىپ كەتۋىنەن الاڭداۋدا. ال، دونالد ترامپتىڭ پىكىرىنە قارسى ير-نىڭ پرەزيدەنتى حاسان رۋحاني وتكەن اپتانىڭ سوڭىندا: «اقش پرەزيدەنتى ترامپ بۇل كەلىسىمدى بۇزا المايدى. يراننىڭ بۇل كەلىسىم بويىنشا كورسەتكەن ناتيجەسىن ءبىر ەمەس، ون ترامپ كەلسە دە تەرىستەي المايدى»، – دەگەن پىكىر ءبىلدىردى. بۇل تۋرالى «شينلاڭ» اقپاراتتىق اگەنتتىگىنىڭ رەسمي سايتى حابارلاعان ەدى.

جوعارىداعى پىكىرىن يران پرەزيدەنتى تەھران ۋنيۆەرسيتەتىنىڭ اشىلۋ سالتاناتى كەزىندە ايتقان. ول سوزىندە: «يران يادرولىق كەلىسىمىنەن كەيىن ءبىز قايتالانباس ناتيجەلەردى قولعا الدىق. ءارى ەشكىم دە ونى الىپ كەتە المايدى. ترامپ تا سولاي، ءبىر ەمەس، ون ترامپ كەلسە دە بۇنى تەرىستەي المايدى»، – دەدى.

قازىرگى جاعدايدان الىپ قاراعاندا 2015 جىلى جاسالعان كەلىسىم اقش جاعىنان بۇزىلاتىن بولسا، الەم ەلدەرى يراندى ەمەس، كەرىسىنشە قۇراما شتاتتى ايىپتايتىنى داۋسىز. بۇل اقش-تىڭ الەم الدىنداعى بەدەلىنە نۇقسان كەلتىرەدى. دەگەنمەن، وتكەن اپتانىڭ سوڭعى كەزىندەگى اقش باسىلىمدارىنىڭ حابارىنا سەنسەك، كونگرەسس كەلىسىمدى بۇزاتىن قادامعا بارا قويمايدى دەپ ۇمىتتەنەمىز.

“The Qazaq Times”