اقش سولتۇستىك كورەياعا شىعار جول قالدىرماۋعا تىرىسۋدا

اقش پەنتاگون باسشىسى جيم مەتتيس جۋرناليستەرگە بەرگەن مالىمەتىندە، كورەي تۇبەگى ماسەلەسىنىڭ ءالى دە ديپلوماتيالىق جولمەن شەشىم تابۋىن قۋاتتايتىنىن، ءتىپتى اقش پەن سولتۇستىك كورەيا اراسىندا اۋىر سوزدەر الماسىپ جاتسا دا، قايشىلىقتى بەيبىت جولمەن شەشۋگە كۇش سالۋ كەرەك ەكەنىن اتاپ ءوتتى. بۇل تۋرالى «The Wall Street Journal» باسىلىمى حابارلادى.

مەتتيس سەيسەنبى كۇنى ءۇندىستان قورعانىس مينيسترلىگىن ساپارى كەزىندە ءباسپاسوز ءماسليحاتىن وتكىزىپ، اقش قارۋلى كۇشتەرىنىڭ سولتۇستىك كورەيادان كەلەتىن ەڭ قاۋىپتى قاتەرلەرگە دە توتەپ بەرە الاتىنىن ايتتى. الايدا، قارۋلى كۇشتەرىنىڭ باستى مىندەتى شيەلەنىستى شەشۋگە تىرىساتىن ديپلوماتيالىق قىزمەتكە قولداۋ كورسەتۋ ەكەنىن اتاپ كورسەتتى.

مەتتيستىڭ پىكىرىنشە، كحدر ماسەلەسىن ديپلوماتيالىق جولمەن شەشۋ، امەريكا قۇراما شتاتتارىنىڭ بىردەن ءبىر ماقساتى جانە ول اقش پرەزيدەنتى دونالد ترامپ وسى ماسەلە بويىنشا وتە ناقتى مالىمدەمە جاسادى دەپ ەسەپتەيدى. ونىڭ بۇل رەتكى ساپارىنىڭ باستى ماقساتى ءۇندىستان قورعانىس مينيسترلىگىمەن جانە پرەمەر-ءمينيسترى نارەندرا موديمەن كەلىسسوزدەر جۇرگىزۋ.

دەگەنمەن ول اسكەري كۇش قولدانۋ شەشىمىن شىعارۋدىڭ مۇمكىندىگى قانشالىق ەكەنىنە ناقتى جاۋاپ بەرمەدى. كەيبىر ەلدىڭ ساراپشىلارى اقش لاۋازىمدىلارى الەمنىڭ ءار تۇكپىرىنە كەلىسسوزدەرگە اتتانىپ جاتقانىنىڭ ءوزى، اق ءۇي مەن پەنتاگون اراسىندا سولتۇستىك كورەياعا باعىتتالعان ءبىر شەشىم قابىلدانىپ بولعانىن، قازىر سول شەشىمدى مۇلتىكسىز جۇزەگە اسىرۋ ءۇشىن وزگە ەلدەرمەن كەلىسسوزدەر جاساپ جاتقانىن بىلدىرەدى دەپ قارايدى. ديپلوماتيانى كوزدەيتىن سىڭاي تانىتا وتىرىپ، ەگەر سوعىس تۋىلىپ جاتسا، سولتۇستىك كورەياعا شىعار جول قالدىرماۋعا تىرىسىپ جاتىر دەگەن دە كوزقاراستار بار. قالاي دەسەك تە، كورەي تۇبەگى ماسەلەسى قازىر اقش قانا ەمەس الەم الدىندا دا كۇن تارتىبىندە ءبىرىنشى تۇر.

“The Qazaq Times”