اقش-تىڭ جويعىش ۇشاقتارى كورەي تۇبەگىندە

اقش ءوزىنىڭ ەكى B-1B جاۋىنگەرلىك ۇشاعى مەن F-35 جويعىش ۇشاعىڭ تورتەۋىن كورەي تۇبەگىنە جاسىرىن تۇردە اتتاندىردى. اقش اۋە كۇشتەرىنىڭ بۇل ۇشاقتارى الداعى ۋاقىتتا بۇۇ باس اسسامبلەياسىنا ءوزىنىڭ قابىلەتىن ايگىلەيدى دەپ كۇتىلۋدە. الدا، باس اسسامبلەيادا الەم باسشىلارى باس قوسىپ، سولتۇستىك كورەيانىڭ يادرولىق سىناقتارىنا قالاي توسقاۋىل قويۋدى اقىلداسادى. بۇل تۋرالى «The Wall Street Journal» باسىلىمىنىڭ ونلاين قىزمەتى جازدى.

اقش-تىڭ تىنىق مۇحيت قولباسشىلىق شتابى حابارلاما تاراتىپ، 31 تامىزدان كەيىن وتكىزىلگەن كەزەكتى جاتتىعۋلارى سولتۇستىك كورەيانىڭ وتكەن اپتاداعى زىمىران سىناعىنا جاۋاپ بەرەتىنىن ايتتى. وسى ايدىڭ باس شەنىندە جانە تامىزدىڭ سوڭعى كەزىندە كحدر ءوزىنىڭ 6-ءشى رەتكى يادرولىق سىناعىن جانە ەكى مارتە بالليستيكالىق زىمىران سىناعىن ارت-ارتىنان جاساپ ۇلگەردى. اقش جانە ونىڭ وداقتاستارى بۇل ارەكەتتەردى قاتاڭ ايىپتادى، بۇۇ قاۋىپسىزدىك كەڭەسىنە جولداپ، قاتاڭ شەكتەۋ قويۋدى تالاپ ەتكەن.

اقش قارۋلى كۇشتەرى تاراتقان مالىمەتتەرگە قاراعاندا، كەشە بولىپ وتكەن اسكەري وقۋ-جاتتىعۋعا وڭتۇستىك كورەيا ءتورت بىردەي جويعىش ۇشاعى جانە جاپونيادان دا 4 جاۋىنگەرلىك ۇشاق قاتىسقانى ءمالىم بولدى. بۇل جولعى جاتتىعۋ شابۋىلدان قورعانۋعا ەمەس، كەرىسىنشە، اۋە كۇشتەرىن سولتۇستىك كورەيانىڭ ماڭىزدى نىساندارىنا قالاي شابۋىل جاساۋدى ۇيرەتۋگە باعىتتالدى.

قازىرگى كەزدە سولتۇستىك كورەيا اتالعان وقۋ جاتتىعۋدى ءوزىنىڭ باق-ى ارقىلى ايىپتاۋ ۇستىندە. پيوڭياڭ (پحەنيان) جاق اقش ۇشاقتارىنىڭ كورەي تۇبەگىندە ۇشۋىنا قاتاڭ نارازىلىق ءبىلدىردى.

“The Qazaq Times”