فوتو: وبزور پرەسسى

سولتۇستىك كورەيانىڭ سىناقتان وتكىزىپ جاتقان زىمىراندارىنىڭ بارلىعى رەسەيلىك زىمىراندار - دەپ جازادى نەمىس تولقىنى اقپارات اگەنتتىگى.

سوڭعى ۋاقىتتا الەم نازارىن وزىنە اۋدارتقان سولتۇستىك كورەيا مەن اقش تەكەتىرەسى جانە كحدر زىمىران سىناقتارى جايىندا گەرمانيانىڭ ميۋنحەن تەحنيكالىق ۋنيۆەرسيتەتىنىڭ پروفەسسورى، ينجەنەر-زىمىران قۇراستىرۋشى روبەرت شمۋكەر نەمىس تولقىنىنا بەرگەن سۇحباتىندا:

«اقش پەن سولتۇستىك كورەيانىڭ ءبىر-بىرىنە جاساپ وتىرعاندارىنىڭ بارلىعى دالباسا. ەكەۋىدە يادرولىق قارۋ قولدانۋعا بارمايدى. بۇنىڭ بارلىعى ساياسي ويىن. ال كحدر-نىڭ شىلدە ايىنىڭ سوڭىندا ۇشىرعان «حۆوسون-14» قۇرلىقارالىق زىمىرانىنا كەلەتىن بولساق. ءبىز ونى زەرتتەپ كوردىك ءبىزدىڭ ەسەبىمىز بويىنشا، 1 توننا سالماعى بار زىمىران ۇزاعاندا 5200 شاقىرىمعا ۇشا الادى ەكەن. ول ۇزاق قاشىقتىققا ۇشسا ۇشاتىن شىعار. بىراق «حۆوسون-14» قۇرلىقارالىق زىمىران ەمەس. جالپى 1984 جىلدان بەرى سولتۇستۋك كورەيا زىمىراندارىنىڭ بىردە ءبىرى بەلگىلى ءبىر نىساناعا باعىتتالىپ ۇشىرىلعان ەمەس. وسى ۋاقىتقا دەيىن سولتۇستىك كورەيا زىمىران سىناقتارىنىڭ دەمو نۇسقاسىن وتكىزىپ كەلدى. ونىڭ ۇستىنە ولار ۇشىرعان زىمىرانداردىڭ بارلىعى كەڭەستەر وداعىنان قالعان ەسكى زىمىراندار بولدى. پيوڭياڭنىڭ (پحەنيانىڭ) 2016 جىلعا دەيىن ۇشىرىپ كەلگەن زىمىراندارىنىڭ بارلىعى كەڭەستەر وداعىنىڭ «SCUD»، «نودون» جانە «توچكا» زىمىراندارى. ال سوڭعى 14 ايدا سىناقتان وتكىزىپ جاتقان راكەتالارى «SCUD» زىمىراندارىنىڭ ساناتىنا جاتپايدى. بىراق بارلىق سىناقتان وتكەن زىمىرانداردىڭ قوزعالتقىشتارى رەسەيلىك تەحنولوگيامەن جاسالعان. بۇل دەگەنىمىز سولتۇستىك كورەيا زىمىرانداردى وزدەرى جاسامايدى، تەك قۇراستىرادى دەگەن ءسوز. بۇلاي دەيتىن سەبەبىم زىمىراندى جاساپ شىعۋ ءۇشىن قىرۋار قارجى مەن ۋاقىت كەرەك. ونىڭ ۇستىنە جاساپ شىققان زىمىراندارىڭنىڭ بارلىعى سىناقتان ءساتتى وتە بەرۋ دەگەن زىمىران قۇراستىرۋ تاريحىندا بولماعان جاعداي. مەن ەشقانداي ەلدىڭ بيلىگىن كىنالاعىم كەلمەيدى. بىراق سولتۇستىك كورەياعا رەسەيلىك زىمىران بولشەكتەرىن نە رەسەيدىڭ ءوزى نەمەسە بۇرىنعى كەڭەستەر وداعىنىڭ قۇرامىندا بولعان ەلدەر جەتكىزىپ وتىر» - دەگەن.

بۇدان بولەك روبەرت شمۋكەر سولتۇستىك كورەيانىڭ اقش-تىڭ اسكەري بازاسى ورنالاسقان گۋام ارالىن اتقىلايمىن دەگەن مالىمدەمەسىنە: «كەزىندە ليۆيا باسشىسى كاددافيدە جەرورتا تەڭىزىندەگى يتاليا ارالىن اتقىلاماق بولعان. بىراق ونىسىنان تۇك شىققان جوق. سەبەبى زىمىراندى اتۋ بار دا، ونى نىسانعا تيگىزۋ بار. وسىدان اق نىسانانى كوزدەۋدىڭ قانداي قيىن ەكەندىگىن اڭعارۋعا بولادى» - دەگەن.

“The Qazaq Times”