فوتو: Informburo.kz

ۇلتتىق قوردىڭ ينۆەستيتسيالىق شىعىنى 784 ملرد تەڭگەنى قۇرادى. بۇل تۋرالى ۇلتتىق بانكتىڭ ءباسپاسوز قىزمەتى حابارلادى.

ۇلتتىق بانكتىڭ مالىمەتىنشە، ۇلتتىق قوردىڭ ينۆەستيتسيالىق وپەراتسيالارىن جۇزەگە اسىرۋ ەرەجەسى بويىنشا قورىنىڭ اكتيۆتەرىن باسقارۋدىڭ بازالىق ۆاليۋتاسى - اقش دوللارى. 2017 جىلعى 1-توقسانداعى باسقارۋ ناتيجەلەرى بويىنشا اقش دوللارىمەن ەسەپتەلگەن ينۆەستيتسيالىق كىرىس پايدا بولعان جانە ول  1,3 ملرد اقش دوللارىن قۇراعان.

ال الدىن الا دەرەكتەر بويىنشا قر ۇلتتىق قورىنىڭ 2017 جىلعى ءبىرىنشى جارتىجىلدىقتاعى ينۆەستيتسيالىق كىرىسى 2,4 ملرد اقش دوللارىن قۇرادى.

784 ملرد تەڭگە مولشەردەگى ينۆەستيتسيالىق شىعىن بولسا قوردىڭ ۆاليۋتالىق اكتيۆتەرىن تەڭگەمەن قايتا باعالاۋ ناتيجەسىندە پايدا بولعان جانە ول 2017 جىلعى 1 توقسانداعى ىسكە اسىرىلماعان شىعىن. سەبەبى ۇلتتىق ۆاليۋتانىڭ اقش دوللارىنا قاتىستى باعامى 333,29 تەڭگەدەن (2016 جىلعى 31 جەلتوقسانداعى جاعداي بويىنشا) 314,79 تەڭگەگە (2017 جىلعى 31 ناۋرىزداعى جاعداي بويىنشا) دەيىن نىعايۋى ەسەپتى كەزەڭدە قوردىڭ ۆاليۋتالىق اكتيۆتەرىنىڭ تەڭگەمەن كورسەتىلگەن قۇنىنىڭ وزگەرۋىنە جانە تەرىس باعامدىق ايىرمانىڭ پايدا بولۋىنا ىقپال ەتكەن.

“The Qazaq Times”