ماحمۋد احمادينەجاد. فوتو: EADaily.

يراننىڭ بۇرىنعى پرەزيدەنتى احمادينەجادقا جەتى بىردەي ايىپ تاعىلىپ، قىلمىستىق ءىس قوزعالدى. 30 شىلدە كۇنى يراننىڭ جوعارى سوت مۇشەلەرىنىڭ ءبىرى حابارلاما جاريالاپ، احمادينەجاد پرەزيدەنتتىك وكىلەتتىك مەرزىمىندە مەملەكەتتىك قارجىنى ورىنسىز پايدالانىلعانى تۋرالى 7 ءتۇرلى قىلمىستىق  ءىس قوزعالدى دەپ مالىمدەدى. بۇل تۋرالى «شينلاڭ» سايتى «پارس.اقپاراتقا» سىلتەمە جاساي وتىرىپ جازدى.

يراننىڭ جوعارعى اۋديت سوتى پروكۋرورى فايازي جەرگىلىكتى باق قۇرالدارىنا بەرگەن حابارىندا، احمادينەجاد پرەزيدەنت بولىپ تۇرعان كەزىندە ميللياردتاعان ۇكىمەت قارجىسىن زاڭسىز پايدالانعان دەپ ايىپتادى. ونىڭ ايتۋىنشا، پرەزيدەنتتىگىنىڭ ەكىنشى وكىلەتتى مەرزىمى كەزىندە (2009-2013 جىلدارى) 2 ملرد اقش دوللارى كولەمىندە قارجىنى زاڭسىز پايدالانعان. جوعارى اۋديت سوتىنىڭ شەشىمىندە ايتىلعان زاڭسىز پايدالانعان قارجى مولشەرىن قايتارۋعا احمادينەجادتىڭ جەكەلىك مال-مۇلكى مۇلدە جەتكىلىكسىز ەكەنىن دە ايتىپ ءوتتى. فايازي سوزىندە: «احمادينەجاد زاڭسىز پايدالانعان قارجىنىڭ مولشەرى تىم كوپ بولعاندىقتان، ونى قالپىنا كەلتىرۋ مۇمكىن ەمەس»،– دەدى. دەگەنمەن ول سوت شەشىمىندەگى قارجىنى ورنىنا كەلتىرە الماسا، احمەدينەجاد قانداي جازاعا ۇشىراۋى مۇمكىن ەكەنى اشىپ ايتپادى.

بەلگىلى بولعانداي يران جوعارى اۋديت سوتى بۇرىنعى پرەزيدەنتكە جازا كەسە مە، الدە سول كەزدەگى ۇكىمەتتى ايىپتى دەپ ساناي ما ول جاعى ءالى دە انىق ەمەس. انىعى، يراندى بىلاي قويعاندا الەمدىك ساياسي ارەنادا اتى ءماشھۇر احمادينەجادتىڭ باسىنا قارا بۇلت ءۇيىرىلىپ تۇر. وسىدان بۇرىن يراننىڭ رۋحاني كوسەمى جاعىنان ونىڭ قايتالاي پرەزيدەنت سايلاۋىنا قاتىسۋ مۇمكىندىگى الىنىپ تاستالعان بولاتىن.

“The Qazaq Times”