"ساد" زىمىرانعا قارسى جۇيەسىنىڭ زىمىران قوندىرعىلى كولىكتەرى. فوتو: The Sun.

29 شىلدەنىڭ تاڭا اتپاي جاتىپ، وڭتۇستىك كورەيا پرەزيدەنتى ءمۇن جا-ين ۇلتتىق قاۋىپسىزدىك كەڭسەسىندە شۇعىل وتىرىس وتكىزدى. جينالىستا ول وڭتۇستىك كورەيا-اقش اراسىنداعى ستراتەگيالىق تەجەۋ باعدارلامالاردى نىعايتۋدى جەدەلدەتۋ تۋرالى تاپسىرما بەردى. بۇل «ساد» زىمىرانعا قارسى جۇيەسىنىڭ، زىمىران قوندىرعىلى 4 كولىگىن ورنالاستىرۋدى دا ءوز ىشىنە قامتيدى. بۇل تۋرالى «شينلاڭ» اقپاراتتىق اگەنتتىگى حابارلادى.

«ساد» زىمىرانعا قارسى جۇيەسى 6 زىمىران قوندىرعىلى كولىكتەن قۇرالادى. سونداي-اق، راديولوكاتسيالىق جۇيەلەردى دە قامتيدى. بيىل ناۋرىزدىڭ باس شەنىندە زىمىران قوندىرعىلى كولىكتەردىڭ ەكەۋى وڭتۇستىك كورەياعا جەتكىزىلگەن.

«ساد» جۇيەسىن ورناتۋ قىتايدىڭ قارسىلىعىنا ۇشىراپ كەلە جاتقان، قىتاي-كورەيا اراسىنداعى باستى قايشىلىقتىڭ ءبىرى. دەگەنمەن، سولتۇستىك كورەيانىڭ زىمىران سىناقتارى جيىلەگەن سايىن، اقش پەن وڭتۇستىك كورەيا «ساد» جۇيەسىن ورناتۋدى قاجەت دەپ تابادى. بۇل قايشىلىق كورەي تۇبەگىندەگى جانە سولتۇستىك شىعىس ازياداعى بىتپەس داۋدىڭ ءبىر ۇشى.

قىتاي ءسىم-ءنىڭ ءبىرىنشى ماۋسىمدا جاريالاعان حابارىندا، اقش-تىڭ «ساد» جۇيەسىن ورنالاستىرۋى، قىتايدىڭ ستراتەگيالىق قاۋىپسىزدىگىنە اۋىر زيان كەلتىرىپ، ايماقتاعى ستراتەگيالىق تەپە-تەڭدىككە نۇقسان جەتكىزەدى; ايماقتاعى تۇراقتىلىق پەن قاۋىپسىزدىككە قاتەر توندىرەدى دەگەن بولاتىن. سونىمەن بىرگە، بۇل جۇيە ورنالاستىرىلسا، ايماقتاعى قايشىلىقتى كەلىسسوزدەر ارقىلى شەشۋ قيىنعا سوعادى دەپ قارايدى. مىنە وسىنداي ۋاجدەرىن ايتىپ، رەسمي بەيجىڭ «ساد» جۇيەسىن ماڭىنا جولاتقىسى كەلمەگەن.

وڭتۇستىك كورەيا پرەزيدەنتىنىڭ شۇعىل تۇردە وتكىزگەن قاۋىپسىزدىك كەڭەسىندە، «ساد» قايتالاي اۋىزعا الىنىپ، اقش-كورەيا اراسىنداعى ستراتەگيالىق قورعانۋ باعدارلامالارىن نىعايتۋ كەرەكتىگىن العا تارتسا، قىتاي-كورەيا اراسى تاعى دا الىستاي تۇسپەك.

“The Qazaq Times”