فوتو: ينفو-يسلام

رەجەپ تايىپ ەردوعان بارشا مۇسىلمان جۇرتىنا ۇندەۋ تاستادى.
تۇركيا پرەزيدەنتى بارشا مۇسىلماندى ءال-اقساعا (ماسجيد ءال-اقسا) زيارات ەتۋگە شاقىردى. بۇل تۋرالى «تۇرىك تەلە-راديو» قىزمەتىنىڭ رەسمي سايتى حابارلايدى.

ول ادىلەت جانە دامۋ پارتياسىنىڭ ۇلتتىق ماجىلىسىندەگى سويلەگەن سوزىندە; «بۇل جەردەن بارشا مۇسىلمانعا ۇندەۋ تاستايمىن. قاسيەتتى مەكەنگە زيارات جاساسىن، ەگەر بارا الماسا وندا جاردەم جىبەرسىن» دەگەن.

سونىمەن قاتار ەردوعان يزرايل اسكەرلەرىنىڭ مۇسىلمانداردىڭ قاسيەتتى مەكەنى ءال-اقسا مەشىتىن اياق استى ەتۋ سەبەبىنەن بۇل كۇندە يەرۋساليمنىڭ مۇسىلماندارعا ورتاق ورىن رەتىندە قارالماي قالعانىنا نالىپ «بارشا مۇسىلمان بولىپ وسى قاسيەتتى يەرۋساليمگە يە بولايىق» دەگەندى ايتقان.
قازىرگى ماقسات ءال-اقسانى مۇسىلمانداردىڭ قولىنا الۋى ەكەنىن ايتقان ەردوعان، بۇل كۇندە ءال-اقسانىڭ ءتورت بۇرىشىندا پالەستينالىق قايسار مۇسىلماندار مەن باسقا دا مۇسىلمان قاۋىمنىڭ باسىم تۇرعانىنا سەنىمىن ءبىلدىردى.

“The Qazaq Times”