تەڭىزدەگى گاز قۇبىرى. فوتو: kyrgyztoday.kg

بۇل تۋرالى تۇكىمەنستان سىرتقى ىستەر مينيسترلىگى حابارلايدى. سوڭعى كۇندەرى تۇرىكمەن-يران گاز ماسەلەسىنە قاتىستى يران جانە وزگە ەلدەردىڭ بۇقارالىق اقپارات قۇرالدارىندا ءبىر-بىرىمەن ۇيلەسپەيتىن اقپاراتتار پايدا بولدى دەلىنگەن مينيسترلىكتىڭ ءباسپاسوز بايانىندا.

ولاردىڭ ءبىرازى «ەكىجاقتى كەلىسىمنىڭ سايكەسسىزدىگىنەن» تۇرىكمەننىڭ تابيعي گازىن 2017 جىلدىڭ 1قاڭتارىنان باستاپ يرانعا جەتكىزۋ توقتادى دەگەنگە سايادى. ال، كەلەسى جاريالانىمداردا كەرىسىنشە، «يران تۇرىكمەنستانمەن تۇرىكمەن گازىن جەتكىزۋ بويىنشا 5 جىلدىق كەلىسىمشارتقا قول قويدى» دەلىنگەن. وسى ورايدا، تۇرىكمەنستاننىڭ سىرتقى ىستەر مينيسترلىگى جوعارىداعىداي ءبىر-بىرىنە قاراما-قايشى اقپاراتتاردىڭ نەگىزسىز ەكەنىن مالىمدەيدى. شىن مانىندە، 1997 جىلدىڭ جەلتوقسان ايىنان باستاپ تۇرىكمەنستان گازدى ساتىپ الۋ-ساتۋ كەلىسىمشارتىنا سايكەس ەكىجاقتى كەلىسىمدى قاتاڭ ساقتاي وتىرىپ، يرانعا گاز جەتكىزۋدى جۇزەگە اسىرىپ كەلەدى. وكىنىشكە قاراي، يراننىڭ ۇلتتىق گاز كومپانياسى 2013 جىلدان باستاپ يران يسلام رەسپۋبليكاسىنا بۇعان دەيىن جەتكىزىلگەن تۇرىكمەن تابيعي گازى ءۇشىن قارىزىن وتەۋگە كۇش سالماي وتىر.

يران تاراپىنىڭ ايتارلىقتاي قارىزعا باتۋى سالدارىنان ولارعا ۇزاقمەرزىمدى كەلىسىمشارتقا سايكەس گاز جەتكىزىپ بەرۋگە باعىتتالعان تۇرىكمەنستاننىڭ گاز جەتكىزۋ ينفراقۇرىلىمى شتاتتىق رەجيمى جۇمىسىن قارجىلىق قولداۋدا قيىندىقتار تۋدىردى. 2016 جىلى يران تاراپىنا كوگىلدىر وتىن جەتكىزۋ سالاسىنا قاتىستى قالىپتاسىپ وتىرعان كەلەڭسىز جاعداي تۋرالى سونىمەن قاتار، تۇرىكمەن گازىن جەتىزۋدى تەجەۋ مۇمكىندىگى جايلى بىرنەشە مارتە رەسمي تۇردە اقپارات بەرىلگەن.

بۇل رەتتە، تولەمنىڭ كەشەۋىلدەۋى كوپتەگەن پروبلەمالاردى تۋعىزۋى مۇمكىن ەكەنى ايتىلىپ، تۇرىكمەن تاراپى تۋىنداعان ماسەلەنى جەدەل شەشۋگە باعىتتالعان بىرقاتار ۇسىنىستار ەنگىزدى. الايدا، يراننىڭ ۇلتتىق گاز كومپانياسىنىڭ تۇرىكمەنستاننىڭ سىندارلى باستاماسىنا ەنجارلىعى مەن ماسەلەنى بىرگە شەشۋگە سەلقوستىعى 2017 جىلدىڭ 1-قاڭتارىنان باستاپ تۇرىكمەن گازىنىڭ يرانعا جەتكىزىلۋىن تەجەۋگە ءماجبۇر ەتتى.

تۇرىكمەنستاننىڭ سىرتقى ىستەر مينيسترلىگى، بۇل ماسەلەنى ساياسيلاندىرۋدىڭ كەز-كەلگەن ارەكەتى مەن بۇل تيپتەس اقپاراتتاردى تۇرىكمەن تاراپى جوققا شىعاراتىنىن اتاپ وتەدى.

"The Qazaq Times"