قازاقستان تاۋەلسىز ءباسپاسوز رەيتينگىندە تومەنگى ساتىدا

«شەكاراسىز تىلشىلەر» (RSF) حالىقارالىق ۇيىمىنىڭ الەمدەگى ءسوز بوستاندى جايىنداعى 2017 جىلعى رەيتينگى جاريالاندى.

بۇل رەيتينگتە قازاقستان ءسوز بوستاندىعى جاعىنان 2016 جىلمەن سالىستىرعاندا 160-شى ورىنان 157-ءشى ورىنعا كوتەرىلگەن. الايدا «شەكاراسىز تىلشىلەر» ۇيىمىنىڭ ايتۋىنشا "بۇل كورسەتكىش ءبىر جىل ىشىندە قازاقستاندا جۋرناليستتەرگە قىسىم جاسالمادى دەگەن ءسوز ەمەس. بۇل وزگە ەلدەردە دە ءسوز بوستاندىعىنا شەكتەۋ قويۋ كوبەيگەننىڭ بەلگىسى" دەيدى.

«شەكاراسىز تىلشىلەر» (RSF)  ۇيىمىنىڭ زەرتتەۋىنشە قازاقستاندا 2013 جىلدان بەرى تاۋەلسىز گازەت، جۋرنالدار، سايتتار، بلوگەرلەردى قۋدالاۋ جۇمىسى جالعاسىپ كەلەدى. بۇرىن قازاقستاندا تاۋەلسىز جۋرناليستتەردى ۇرىپ، سوعىپ قورقىتۋ فاكتىلەرى كوپ تىركەلسە، قازىر ميلليونداعان تەڭگە ايىپپۇل سالۋ ارقىلى تاۋەلسىز باق-تىڭ دامۋىنا كەدەرگى جاساۋ فاكتىلەرى كوپتەپ كەزدەسەدى.

«شەكاراسىز تىلشىلەر» (RSF) رەيتينگىندە ورتالىق ازيا ەلدەرنەن قىرعىزستان-89 (2016 جىلى 85), تاجىكستان-149 (2016 جىلى 150), قازاقستان-157 (2016 جىلى 160), وزبەكستان-169 (2016 جىلى 165), تۇركىمەنستان-178 (2016 جىلدان بەرى وزگەرىسسىز), رەسەي 148-ءشى ورىندارعا جايعاسقان. ال دەموكراتيانىڭ قاينار كوزى سانالاتىن اقش-تىڭ ءوزى  بۇل رەيتينگتە 43-ءشى ورىندا.

«شەكاراسىز تىلشىلەر» (RSF) حالىقارالىق ۇيىمى بۇل رەيتينگتى 2002 جىلدان بەرى الەمنىڭ 180 ەلىندەگى  بۇقارالىق اقپارات قۇرالدارىنىڭ   دامۋ جاعدايلارىن سالىستىرىپ جاساپ كەلەدى.

"The Qazaq Times"