9 قاراشادا الماتى گورنيزونى اسكەري سوتىندا قاندى قاڭتاردا وققا ۇشىپ، قايتىس بولعان 4 جاسار ايكوركەم مەلدەحاننىڭ ولىمىنە بايلانىستى سوتتا ءجارىسسوز ءوتتى. وندا ايىپتاۋشى پروكۋرور سوتتان ءىس بويىنشا كۇدىكتى ارمان جۇماندى كىنالى دەپ تانىپ، 7 جىلعا تۇرمە جازاسىنا كەسۋدى سۇراعان.

ايكوركەمنىڭ اكەسى ايدوس مەلدەحان پروكۋروردىڭ سۇراۋىمەن كەلىسپەيدى. ول ىستە كۋاگەر بولعان وزگە بەس اسكەريدى دە جاۋاپقا تارتۋ قاجەت دەيدى.

– بۇنىمەن ءبىز ارينە كەلىسپەيمىز. قارۋ قولدانعان قىلمىسكەرلەر كۋاگەر رەتىندە ءالى دە بوستاندىقتا ءجۇر. ولاردى جاۋاپكەرشىلىككە تارتىپ جاتقان جوق. ءبىزدىڭ ءوتىنىشحاتتارىمىزدى قابىلداپ جاتقان جوق، – دەدى ايدوس مەلدەحان Masa Media تىلشىسىنە.

بۇعان دەيىنگى سوتتا ايىپتالۋشى ارمان جۇماننىڭ قورعاۋشىلارى ايدوس مەلدەحاننىڭ ءوزىن قر قك 119-بابى «قاۋىپتى جاعدايدا قالدىرۋ» بويىنشا جاۋاپقا تارتۋدى سۇراعان.

ايدوس مەلدەحاننىڭ سوزىنشە، بۇل ءوتىنىشتى 10 قاراشادا قارايدى. بۇگىن سوتتا سوڭعى ءسوز ايتىلادى.

سوت جابىق وتۋدە. سۋديا ىستە «مەملەكەتتىك قۇپيا» مالىمەتتەر بارىن العا تارتقان. وعان جابىرلەنۋشى تاراپ قارسىلىق بىلدىرگەن.

بىلتىر قاڭتارداعى جاپپاي نارازىلىق پەن دۇربەلەڭ كەزىندە ايدوس مەدەلحاننىڭ بالالارى مىنگەن كولىككە اسكەريلەر وق جاۋدىرعان. سالدارىنان 16 جاستاعى قىزى جارالانىپ، 4 جاستاعى ايكوركەم وققا ۇشىپ، قايتىس بولعان.