قاندى قاڭتار بويىنشا 16 جىلعا سوتتالعان ەربول جۇمانوۆتىڭ ءىسى جوعارى سوتتا قارالاتىن بولدى. بۇل جونىندە ونىڭ قورعاۋشىسى جالعاس ساپارحانوۆا الەۋمەتتىك جەلىدەگى پاراقشاسىنا جازدى. 

ادۆوكاتتىڭ سوزىنشە، جوعارى سوت اكىمشىلىگىنەن ەربول جۇمانوۆتى ءىسى قارالاتىنى جونىندە حابار كەلگەن. الدىن-الا تىڭداۋ 16 قازانعا بەلگىلەنگەن.

تامىز ايىندا جامبىل وبلىستىق سوتى قاڭتار وقيعاسى كەزىندە «ۇقك پودپولكوۆنيگى داستان ءادىلبايدى ءولتىردى»، «قارۋ-جاراق ۇرلادى جانە ساقتادى» دەپ ايىپتالعان ەربول جۇمانوۆتىڭ ۇكىمىن وزگەرىسسىز قالدىرعان. تاراز قالالىق سوتى ونى 16 جىلعا باس بوستاندىعىنان ايىرعان.

سوتتا ەربول جۇمانوۆ وزىنە تاعىلعان ايىپتى ءىشىنارا مويىنداعان. ول قارۋ-جاراق العانىن راستاپ، داستان ءادىلبايدى ولتىرمەگەنىن ايتقان.

قاڭتار بويىنشا بۇل ىستە ەربول جۇمانوۆتان وزگە سەگىز ادام جاۋاپقا تارتىلعان. اتاپ ايتقاندا، نۇراحان ماحاتوۆ – 6 جىلعا، ايبول ساعىنتاي مەن جاقسىلىق ابدۋللاەۆ 5 جىلعا بوستاندىعىنان ايىرىلعان. ءىس بويىنشا سوتقا تارتىلعان وزگە بەس ادام – قانات نۇراحانۇلى، ەرماحان سايلاۋوۆ، داۋرەن نۇراليەۆ، دوسمۇحاممەد سادىقوۆ پەن سالامات قوسانوۆ راقىمشىلىققا ىلىگىپ، سوت زالىنان بوساپ شىققان.

ءبولىسۋ