قاراعاندى وبلىسىنداعى "قازاقستان" شاحتاسىندا بەسىنشى كەنشىنىڭ دەنەسى تابىلدى، -دەپ جازدى ازاتتىق راديوسى.

بۇل جونىندە "ارسەلورميتتال تەمىرتاۋ" 19 تامىزدا تۇندە حابارلادى. كومپانيا قازا بولعان بارلىق جۇمىسشىنىڭ اتى-ءجونىن جاريالادى:

1. دەنيس گەننادەۆيچ ستەشين، 1978 جىلى تۋعان، 4 رازريادتاعى جەراستى ۇڭگۋشى، وسى سالادا 21 جىل ىستەگەن;
2. ارتۋر ريناتوۆيچ حاليكوۆ، 1994 جىلى تۋعان، 4 رازريادتاعى جەراستى ەلەكتروسلەسارى، وسى سالادا 10 جىل ىستەگەن;
3. ۆيكتور سەرگەەۆيچ بۋرگۋن، 1966 جىلى تۋعان، 5 رازريادتاعى جەراستى ەلەكتروسلەسارى، وسى سالادا 39 جىل ىستەگەن;
4. ۆيتالي ۆلاديميروۆيچ سليۋنكوۆ، 1965 جىلى تۋعان، 5 رازريادتاعى جەراستى ەلەكتروسلەسارى، وسى سالادا 39 جىل ىستەگەن;
5. يليا الەكساندروۆيچ ستاروۆويت، 1996 جىلى تۋعان، 3 رازريادتاعى جەراستى ەلەكتروسلەسارى، وسى سالادا 4 جىل ىستەگەن.

17 تامىزدا تاڭەرتەڭ اتالعان شاحتادا ءورت بولىپ، جەر استىنداعى 227 شاحتەردىڭ 222-ءى جەر ۇستىنە شىعارىلعان، قالعان بەسەۋى ىزدەستىرىلگەن. 17 تامىزدا كەشكە 58 جاستاعى ۆيتالي سليۋنكوۆتىڭ دەنەسى تابىلدى. 18 تامىزدا – ۆيكتورا بۋرگۋن، كۇندىز 45 جاستاعى دەنيس ستەشين شاحتادان ءولى كۇيدە تابىلدى. قالعان ەكەۋىنىڭ دەنەسى تابىلعانى 19 تامىز كەشكە حابارلاندى.

ءورتتىڭ نەدەن شىققانى ازىرگە ايتىلمادى. كەي اقپاراتقا قاراعاندا، كونۆەيەر لەنتاسى ورتەنىپ، قاتتى ءتۇتىن جانە جوعارى تەمپەراتۋرانىڭ سالدارىنان 5 ادام شاحتادان شىعا الماي قالعان.

"ارسەلورميتتال تەمىرتاۋ" كاسىپورىندارىندا وسىعان ۇقساس اپاتتار ءجيى بولىپ تۇرادى. 2022 جىلى 3 قاراشادا شاحتينسكىدەگى امت كومپانياسىنىڭ لەنين اتىنداعى شاحتاسىندا اينالاعا مەتان تاراپ، جارىلىس بولىپ، بەس ادام قازا تاپقان، ءتورت ادام ۋلانعان. بۇل وقيعا بويىنشا تەرگەۋ ءالى اياقتالعان جوق. زارداپ شەككەن شاحتەرلەردىڭ جاقىندانى قاۋىپسىزدىككە جاۋاپتىلار جازادان قۇتىلىپ كەتە مە دەپ قاۋىپتەنەدى. ولاردىڭ الاڭداۋىنا نەگىز بار، سەبەبى 2021 جىلى ابايداعى امت شاحتاسىنداعى جارىلىسقا بايلانىستى قوزعالعان ءىس توقتاتىلعان ەدى. ابايداعى جارىلىستا ادام شىعىنى بولسا دا، ەشكىم جاۋاپقا تارتىلعان جوق.

قاراعاندىداعى بەلسەندىلەر مەن بۇرىنعى شاحتەرلاردىڭ ايتۋىنشا، كومپانيا كومىر شاحتاسىندا قاۋىپسىزدىككە ءبولىنۋى ءتيىس اقشانى ۇنەمدەگەندىكتەن وسىنداي قايعىلى وقيعالار جيىلەگەن.

سەنبى كۇنى قاراعاندى وبلىسىنا پرەمەر-مينيستر ءاليحان سمايىلوۆ كەلىپ، "ارسەلورميتتال تەمىرتاۋدى" ءوندىرىستى جاڭارتۋ جانە ينۆەستيتسيا تارتۋ ماسەلەسى بويىنشا العان مىندەتتەمەلەرىن ورىندامادى دەپ ايىپتادى. ء"وندىرىس قاۋىپسىزدىگىنە دەگەن كوزقاراسىن ەسكەرگەن ۇكىمەت بۇل ينۆەستوردىڭ قازاقستاندا بولعانىن كۇپ كورمەيدى" دەدى ول. كومپانيا بۇل مالىمدەمەگە رەاكتسيا بىلدىرگەن جوق. 2022 جىلى بىرنەشە اپاتتان كەيىن دە وسىعان ۇقساس مالىمدەمەلەر ايتىلعان، الايدا كومپانيا ءالى كۇنگە دەيىن جۇمىس ىستەپ كەلەدى. 1995 جىلى جەكەشەلەندىرۋ ناۋقانى كەزىندە ونىمەن جاسالعان كەلىسىمشارت جاريالانعان جوق.

18 تامىز كۇنگى شاحتينسكىدەگى بريفينگ كەزىندە جۋرناليستەر "ارسەلورميتتال تەمىرتاۋ" وكىلى سەرگەي وگايدان كومىر شاحتاسى مەن مەتالل كومبيناتىن مەملەكەت مەنشىگىنە قايتارۋ مۇمكىندىگى تۋرالى سۇراعان. وگاي بۇل سۇراققا جاۋاپ بەرۋگە وكىلەتى جەتپەيتىنىن ايتتى. "ەۋروپادا تۇراتىن ميللياردەر لاكشمي ميتتال قايعىلى وقيعالار بولعان كەزدە نەگە قازاقستانعا كەلمەيدى؟" دەگەن سۇراققا وگاي اكتسيونەر وكىلدەرى "جاعدايدان حاباردار" دەپ قىسقا قايىردى.