ادۆوكاتى ابزال ايداروحانوۆ سوتتان كۇدىكتى قالاس نۇرپەيىسوۆكە تەرگەۋ كەزىندە قىسىم جاسالىپ، سالدارىنان ونىڭ ءوز-وزىنە قول جۇمساۋىنا ءماجبۇر بولعانىن ايتتى. ونىڭ سوزىنشە، تەرگەۋ زاڭى ساقتالماعان، سول سەبەپتى دە نۇرپەيىسوۆتى اقتاۋ قاجەت.

– تەرگەۋ كەزىندە رۇقسات ەتىلمەگەن ادىستەر قولدانىلعان. ءىستى بولىپ، تۇركىسىب اۋداندىق سوتى ۇكىم شىعارعان بەس ادام نۇرپەيىسوۆكە قارسى كۋالىك ەتكەن. ولاردىڭ ءبىرى كۋا بولۋدان باس تارتسا، ەندى ءبىرى كۋالىك بەرۋگە ماجبۇرلەگەنىن ايتتى. تاعى ءبىر ادام ەشقانداي كۋالىك بەرمەگەنىن، تولتىرىلعان قاعازعا قول قويىپ بەرگەنىن مالىمدەدى. بۇنىڭ بارلىعى زاڭ بۇزۋشىلىق. قر قك 272-بابىنىڭ 1-بولىگى، 200-بابىنىڭ 2-بولىگى، 191-بابىنىڭ 1-بولىگى، 269-بابىنىڭ 3-بولىگى بويىنشا اقتاۋدى سۇرايمىن، – دەدى ادۆوكات.

بۇدان بولەك، ادۆوكات قالاس نۇرپەيىسوۆكە تەرگەۋ كەزىندە وپپوزيتسيالىق ساياساتكەر جانبولات ماماي مەن ساياسي بەلسەندى دارحان ۋاليەۆكە قارسى كۋالىك ەتۋ ۇسىنىلعانىن ايتتى. ونىڭ سوزىنشە، نۇرپەيىسوۆ بۇل ۇسىنىستان باس تارتقان. قالاس نۇرپەيىسوۆتىڭ ءوزى ادۆوكاتىنىڭ ايتقاندارىمەن كەلىسەتىنىن ايتتى.

ايگەرىم تىلەۋجان وزىنە تاعىلعان ايىپتى مويىندامايدى. ونىڭ سوزىنشە، بارلىق ايىپ، تەك كۋاگەرلەردىڭ ءسوزى نەگىزىندە جيناقتالعان.

– ماعان تاعىلعان بارلىق ايىپ تەك عانا كۋاگەرلەردىڭ سوزدەرىنەن قۇرىلعان. ولاردىڭ كوپشىلىگى كۋالىكتى قىسىممەن بەرگەن. ماعان قاتىستى بىردە-ءبىر ساراپتاما جوق. ساراپتاما جاسالعان ۆيدەو ءبىزدىڭ شاعىمىمىزدان كەيىن ىستەن الىنىپ تاستالدى. ۆيدەودا مەنىڭ اۋەجايدا 19 مينۋت جۇرگەنىم، ەشنارسەنى شاعۋعا، حالىقتى ءبىر نارسەنى ۇرلاۋعا، توناۋعا شاقىرماعانىم بەلگىلى. 12 كۋاگەر بار. ولاردىڭ 10-ى وزدەرىنە قىسىم جاسالعانىن ايتتى، – دەدى تىلەۋجان.

ايگەرىم تىلەۋجان ءىستىڭ ساياسي تاپسىرىس ەكەنىن ايتتى. ول بۇعان دالەل رەتىندە باس پروكۋرور بەرىك اسىلوۆتىڭ پارلامەنتتە سويلەگەن ءسوزىن مىسالعا كەلتىردى.

– باس پروكۋرور بەرىك اسىلوۆ مەن جانە قالاس نۇرپەيىسوۆتى كارىم ماسىموۆپەن (قاڭتار وقيعاسىنان كەيىن 18 جىلعا سوتتالعان ۇقك بۇرىنعى باسشىسى – رەد)  بىرگە اتاپ، «ەكسترەميستەر الماتى اۋەجايىن باسىپ الماق بولدى» دەپ بىرقاتار زاڭسىزدىق جاساپ، جالعان اقپارات تاراتتى. مەن ەشقانداي ءدىني-ەكسترەميستىك ۇيىمنىڭ مۇشەسى ەمەسپىن. ءبىز وسىعان بايلانىستى ۇقك مەن پروكۋراتۋراعا ساۋال جولداپ، جاۋاپ الدىق. ول مەنىڭ ابىرويىما نۇقسان كەلتىرەتىن اقپارات تاراتتى. سونىمەن قاتار، كىناسىزدىك پرەزۋمپتسياسىن بۇزدى. ياعني سوت بولماي جاتىپ، ءبىزدى ايىپتاپ، سوتتاپ جىبەردى. ءاۋ، باستا بۇل ساياسي تاپسىرىس بولعان. بۇل ەلگە ءبىز مەن سياقتى جۋرناليست، قالاس نۇرپەيىسوۆ سياقتى مۇعالىم، مىنا جىگىتتەر سياقتى پاتريوتتار كەرەك ەمەس بولىپ تۇر، – دەدى ول.

قاڭتار وقيعاسى كەزىندە اۋەجايدى باسىپ الۋ» ىسى بويىنشا بەس ادامنىڭ سوتى بيىل 30 ناۋرىزدا باستالعان. تەرگەۋ ورىندارى بۇل ءىس بويىنشا جۋرناليست ايگەرىم تىلەۋجانعا، بەلسەندى قالاس نۇرپەيىسوۆكە، نۇرلان دالىباەۆقا، ەرمۇحامەت شيلىباەۆقا، جانايدار كارمەنوۆكە ايىپ تاققان. ايگەرىم تىلەۋجان ۇيقاماقتا، وزگە تورتەۋى بىلتىر كوكتەمنەن بەرى تەرگەۋ اباقتىسىندا قاماۋدا وتىر.

ايىپتاۋ قورىتىندىسىندا ايگەرىم تىلەۋجان مەن قالاس نۇرپەيىسوۆ قاڭتار وقيعاسى كەزىندە الماتى اۋەجايىندا نارازى توپتىڭ الدىندا «بيلىككە قارسى سوزدەر ايتىپ، ولاردى زاڭسىز ءىس-ارەكەتكە ايداپ سالىپ، جاپپاي تارتىپسىزدىك ۇيىمداستىرعان» دەپ كورسەتىلگەن. 20 ماۋسىمدا وتكەن سوت وتىرىسىندا ولاردىڭ «جاپپاي تارتىپسىزدىك ۇيىمداستىرعانىن» كورەسەتەتىن ۆيدەونى سۋديا «جەتكىلىكتى دالەل بولا المايدى» دەپ ىستەن الىپ تاستاعان.

كۇدىكتىلەردىڭ بارلىعى سوت بارىسىندا تاعىلعان ايىپتى مويىندامايتىندارىن بىرنەشە رەت ايتقان. ايگەرىم تىلەۋجان مەن قالاس نۇرپەيىسوۆ بيلىكتى اشىق سىنايتىن ازاماتتىق بەلسەندى رەتىندە تانىلعان. ال نۇرلان دالىباەۆ، ەرمۇحامەت شيلىباەۆ جانە  جانايدار كارمەنوۆ بۇعان دەيىن بەلسەندىلىگىمەن كوزگە تۇسپەگەن.

ءىس بويىنشا كۇدىكتى دەپ تانىلعان ايگەرىم تىلەۋجان – جۋرناليست، اۋدارماشى، قالاس نۇرپەيىسوۆ – تاريح ءپانىنىڭ مۇعالىمى، نۇرلان دالىباەۆ، ەرمۇحامەت شيلىباەۆ،  جانايدار كارمەنوۆ – تاكسي جۇرگىزۋشىسى بولىپ جۇمىس ىستەگەن.