جاڭاوزەندە مۇناي-گاز سالاسىنان تۇراقتى جۇمىس تالاپ ەتىپ، ءساۋىردىڭ باسىنان بەرى نارازىلىق بىلدىرگەن "بەرالى ماڭعىستاۋ Company" كاسىپورنىنىڭ بۇرىنعى جۇمىسشىلارى ەرەۋىلدى توقتاتتى. بۇل جونىندە ازاتتىققا مۇنايشىلاردىڭ ءبىرى ەسەنجان ءابدىراحيموۆ حابارلادى، -دەپ جازدى ورتالىق ازيا جاڭالىقتار قىزمەتى.

سەيسەنبى كۇنى كەشكىسىن "وزەنمۇنايگاز" كومپانياسى نارازى مۇنايشىلار ء"مولدىر مۇناي سەرۆيس" كومپانياسىنا جۇمىسقا تۇرۋعا كەلىسكەنىن حابارلاعان ەدى.

مۇنايشىلاردىڭ سوزىنە قاراعاندا، بۇعان دەيىن قويعان تالاپتارىنىڭ 90 پايىزىن ورىنداۋ جونىندە ۋادە بەرىلگەن.

– جۇمىستى 20 ماۋسىمنان باستايمىز دەپ وتىرمىز. ەگەر الداپ كەتپەسە، تالاپتارىمىزدىڭ 90 پايىزىن ورىنداۋعا ۋادە بەرىپ وتىر، – دەدى سارسەنبى كۇنى تاڭەرتەڭ ەسەنجان ءابدىراحيموۆ ازاتتىققا.

مۇنايشىلار جۇمىسقا ورنالاسۋعا كەلىسكەنى تۋرالى جاڭالىق ولار استاناعا قايتادان بارامىز دەپ مالىمدەگەننەن كەيىن تاراعان. وتكەن اپتادا نارازى مۇنايشىلار "قۇرال-جابدىعى جاڭارتىلماعان، جۇمىسشىلارىنىڭ قۇقىعى قورعالماعان، زاڭعا باعىنبايتىن مەكەمەلەردەن جۇمىس ۇسىنىپ، الدارقاتقىسى كەلەدى، ءبىز وعان كەلىسپەيمىز، استاناعا بارامىز" دەپ مالىمدەگەن ەدى.

13 ماۋسىم كۇنى "وزەنمۇنايگاز" كومپانياسى تاراتقان حابارلامادا "بەرالىنىڭ" بۇرىنعى جۇمىسشىلارى اتالعان كومپانياعا ء("مولدىر مۇناي سەرۆيس") اۋىسقاننان كەيىن بۇرىنعى ەڭبەك جاعدايى ساقتالاتىنى" ايتىلعان.

  • "بەرالى ماڭعىستاۋ Company" كاسىپورنىنىڭ بۇرىنعى جۇمىسشىلارى "وزەنمۇنايگاز" كومپانياسى الدىندا ءساۋىردىڭ باسىنان بەرى ەرەۋىلدەتكەن. ءساۋىردىڭ ورتاسىندا ولار استاناعا بارىپ، نارازىلىق ءبىلدىردى. ءبىر تاۋلىك ەنەرگەتيكا مينيسترلىگى الدىندا قونعان مۇنايشىلاردى 11 ساۋىردە كەشكە قاراي پوليتسيانىڭ ارنايى جاساعى كۇشتەپ ۇستاپ اكەتكەن. بۇدان سوڭ جاڭاوزەن مەن اقتاۋ تۇرعىندارى جانە الماتى، استانا مەن وزگە وڭىرلەردەگى بەلسەندى ازاماتتار ۇستالعان مۇنايشىلاردى بوساتۋدى تالاپ ەتتى.
  • 12 ساۋىردە تاڭەرتەڭ مۇنايشىلاردىڭ كوبى پويىزبەن جاڭاوزەنگە قايتارىلىپ، 10 ادام كەلىسىم جۇرگىزۋ ءۇشىن استانادا قالعان. 20 ساۋىردە مۇنايشىلار قمگ كەلىسسوزدى توقتاتقانىن، تالاپتارى ءالى ورىندالماعانىن جەتكىزگەن. ال قمگ "ارنايى كوميسسيا" قۇرىلعانىن، جاڭاوزەندە مۇناي-گاز سالاسىنداعى كاسىپورىنداردىڭ جۇمىسى تەكسەرىلەتىنىن مالىمدەگەن.
  • بۇعان دەيىن قمگ-نىڭ ارنايى كوميسسياسى "وزەنمۇنايگاز" بەن وعان ەنشىلەس مەكەمەلەردەن ادامداردى جۇمىسقا زاڭسىز الۋ، مۇناي وندىرەتىن جابدىقتى جالعا الۋ قۇنىن اسىرا كورسەتۋ جانە تاعى دا باسقا "زاڭسىزدىقتار" انىقتالعانىن حابارلاعان. بۇعان دەيىن "وزەنمۇنايگاز" بەن "بەرالى ماڭعىستاۋ Company" كومپانيالارىنىڭ لاۋازىمدى تۇلعالارىنا قاتىستى تەرگەۋ جۇرگىزىلىپ جاتقانى حابارلانعان.