17 مامىردا پرەزيدەنتتىڭ ءباسپاسوز حاتشىسى رۋسلان جەلدىباي «Facebook» جەلىسىندە مەملەكەت باسشىسى قاسىم-جومارت توقاەۆتىڭ رەسمي جۇمىس ساپارىمەن قىتايعا بارعانىن حابارلادى. ساپار بارىسىندا توقاەۆ قىتاي توراعاسى سي تسزينپينمەن كەزدەسەدى دەپ جوسپارلانۋدا.

 – كەزدەسۋ بارىسىندا ەكى ەل اراسىنداعى ستراتەگيالىق سەرىكتەستىكتى ودان ءارى نىعايتۋ، ساۋدا جانە ەكونوميكا، ينۆەستيتسيا، كولىك-لوگيستيكا، ەنەرگەتيكا سالالارىنداعى ىنتىماقتاستىقتى كەڭەيتۋ، سونداي-اق مادەني-گۋمانيتارلىق بايلانىستاردى تەرەڭدەتۋ ماسەلەلەرى قاراستىرىلادى، دەيدى رۋسلان جەلدىباي.

18 مامىردا توقاەۆ قىتايدىڭ ءىرى كومپانيالارىنىڭ باسشىلارىمەن كەزدەسەدى جانە سيان قالاسىنداعى قۇرعاق پورتتا قازاقستاننىڭ لوگيستيكا ورتالىعىنىڭ ىرگەتاسىن قالاۋ راسىمىنە، 19 مامىردا «ورتالىق ازيا – قىتاي»سامميتىنە قاتىسادى. بۇعان قوسا، توقاەۆ سيان قالاسىنداعى قازاقستان باس كونسۋلدىعىنىڭ سالتاناتتى تۇردە اشىلۋ راسىمىنە دە بارادى.

سوڭعى ۋاقىتتارى قازاقستاندا قىتايمەن ارادا 30 كۇندىك ۆيزاسىز رەجيم ەنگىزۋگە قارسىلىق كۇشەيگەن. 1 مامىردا الماتىداعى ورتالىق ساياباق الدىندا ءبىر توپ بەلسەندى قىتاي ەكسپانسياسىنا، ۆيزاسىز رەجيمگە قارسى نارازىلىق اكتسياسىنا شىققان. كەيىننەن ولاردى پوليتسيا كۇشتەپ ۇستاعان.

بۇگىن، 17 مامىردا الماتىدا تىركەلمەگەن «اتاجۇرت» پارتياسىنىڭ مۇشەسى بەكزات ماقسۇتحانۇلىن پوليتسيا الىپ كەتكەن. ادۆوكات شىنقۋات بايجانوۆتىڭ سوزىنشە، ماقسۇتحانۇلىنىڭ ۇستىنەن «تىركەلمەگەن ۇيىم جۇمىسىنا قاتىسۋ» بابى بويىنا ءىس قوزعالۋى مۇمكىن

بۇعان دەيىن بەكزات ماقسۇتحانۇلى «Nagyz Atajurt Kazakh Human Rights» ۇيىمىنىڭ youtube پاراقشاسىندا 17 مامىردا ميتينگىگە شىعاتىنىن مالىمدەگەن. ميتينگىدە قازاقستان مەن قىتاي اراسىندا «ۆيزاسىز ءتارتىپ ەنگىزۋ تۋرالى» قىتايدىڭ سيان قالاسىندا قول قويىلۋى مۇمكىن كەلىسىمگە قارسىلىق بىلدىرەتىنىن ايتقان. ول اكىمدىككە ميتينگىگە شىعاتىنىن ەسكەرتكەن. بىراق رۇقسات ەتپەۋ تۋرالى ەشقانداي رەسمي حات الماعان.

قاسىم-جومارت توقاەۆ 2019 جىلى دا ول قازاقستان ەكونوميكاسىنداعى قىتاي ۇلەسىن كوبەيتۋگە قارسىلىق بولىپ جاتقان كەزدە قىتايعا مەملەكەتتىك ساپارمەن بارعان. ول قىتايعا ساپارى كەزىندە، 17 مامىردا 70 جاسقا تولدى.