28 ساۋىردە وتكەن سوت وتىرىسىندا سۋديا قادىربەك نۇرجان كۇدىكتىلەردىڭ بارلىعىن كىنالى دەپ تانىپ، جاقسىلىق ابدۋللاەۆتى 5 جىلعا، نۇراحان ماحاتوۆ پەن ايبول ساعىنتايدى 6 جىلعا، ەربول جۇمانوۆتى 16 جىلعا باس بوستاندىعىنان ايىرۋ جازاسىنا كەستى. قانات نۇراحانۇلى، ەرماحان سايلاۋوۆ، داۋرەن نۇراليەۆ، دوسمۇحاممەد سادىقوۆ، سالامات قوسانوۆتى راقىمشىلىق زاڭىن قولدانىپ، سوت زالىنان بوساتتى.

سۋديا ۇكىمدى وقىپ جاتقان ۋاقىتتا ەربول جۇمانوۆ سوتتىڭ ادىلەتسىز وتكەنىن، سوتتى تىڭداۋدىڭ قاجەتى جوعىن ايتىپ، «توقاەۆ ەشنارسە وزگەرتكەن جوق» دەپ ايقايلادى.

– ءادىل باعاسىن بەرەمىن دەگەن. اقيقات وسى ما؟ تىڭداماي اق قويىڭدار ونى (سۋديانى – رەد). «ءادىل باعاسىن بەرەمىن، شىندىقتى ايتامىن» دەگەن. قانە شىندىعى؟ بارلىعى كوميتەتتەن (ۇلتتىق قاۋىپسىزدىك كوميتەتىنەن – رەد) قورقادى. تۇكتە وزگەرتكەن جوق توقاەۆ. سوعان سەنىپ جۇرگەن ءبىز اقىماقپىز. 1986 جىلى دا (حالىق – رەد) قىرىلدى. نە ءۇشىن قىرىلدى؟ نە ءۇشىن؟ جالعىز ءوزىم قىرىق ادامعا قىرىپ كەتەتىن بولسام بۇلار ەرتەڭ قالاي وتان قورعايدى؟ قالاي قورىقپايسىزدار؟ ەرتەڭ سەندەردىڭ دە تۋىستارىڭا وسىنى ىستەيدى. بۇلار ءبىر-بىرىمەن اتىسقاندارىن، رەزونانس بولاتىن ءبىلىپ تۇر. ايتا المايدى، – دەدى جۇمانوۆ سوت زالىندا.

ەربول جۇمانوۆتى كۇزەت قول-اياعىنان باسىپ ۇستاپ، ازاماتتىق كيىمدەگى ادام باسۋ ايتتى. بىراق ول قارسىلىعىن توقتاتپادى.

– تۇرمەدە ءولۋىم كەرەك بولسا دايىنمىن. تەك مىنا باسسىزدىق توقتاسىن. قيناپ جاتىر، ۇرىپ جاتىر، قانشا قابىرعامدى سىندىردى. سونىڭ بىرەۋىن ايتپاي وتىرمىز... بۇلارعا قان كەرەك. بۇل جولى ءبىر-ەكى ادام كەتەرمىز. كەلەسى جولى بۇلار قانشا ادامدى سوتتايدى. توقتامايدى بۇلار، – دەدى ول.

جۇمانوۆ قارسىلىعىن توقتاتپاعان سوڭ سۋديا قادىربەك نۇرجان سوت ۇكىمىن ءتۇسىندىرۋدى اياعىنا دەيىن جالعاستىرماي، سوتتى جابىق دەپ جاريالادى. پروتسەسس اياقتالعان سوڭ سوتتالۋشىلاردىڭ تۋىستارى ۇزاق ۋاقىتقا دەيىن دالادا كەتپەي تۇردى. كەيبىرى مەديتسينالىق كومەككە جۇگىندى.

بەس جىلعا سوتتالعان جاقسىلىق ابدۋللاەۆتىڭ ايەلى اسەم شامشاەۆا سوت ۇكىمىمەن كەلىسپەيتىنىن ايتتى. ول الداعى ۋاقىتتا اپەللياتسيالىق شىعىم تۇسىرەتىنىن جەتكىزدى.

– كۇيەۋىم ەشنارسە ۇيىمداستىرعان جوق. اپەللياتسياعا بەرەمىن. تۇبىنە ءبارىبىر جەتەمىن. ءبارىبىر شىعارىپ الامىن. ءجاي عانا ميتينگكە شىققانى ءۇشىن ۇيىمداستىرۋشى دەپ بەس جىلعا سوتتاپ جىبەردى. باسقا ەشنارسە ايتپايمىن،– دەدى جىلاپ وتىرىپ شامشاەۆا.

7 ساۋىردە وتكەن سوت وتىرىسىندا ايىپتاۋشى پروكۋرور ايبول ساعىنتايدى 7 جىلعا، داۋرەن نۇراليەۆتى 6 جىلعا، ەربول جۇمانوۆتى 20 جىلعا، جاقسىلىق ابدۋللاەۆتى 7 جىلعا، نۇراحان ماحاتوۆتى 7 جىلعا، قانات نۇراحانۇلىن 7 جىلعا باس بوستاندىعىنان ايىرۋ جازاسىنا كەسۋدى سۇراعان. ال سالامات قوسانوۆ پەن دوسمۇحامبەت سادىقوۆتى 5 جىلعا، ەرماحان سايلاۋوۆتى 6 جىلعا سوتتاپ، راقىمشىلىق زاڭىنا ساي سوت زالىنان بوساتۋدى سۇراعان.

ءىس بويىنشا ايىپتالعان توعىز ادام بۇعان دەيىن ءبىر-ءبىرىن تانىماعان. ولارعا «جاپپاي تارتىپسىزدىك ۇيىمداستىرۋ»، «قارۋدى، وق-دارىلەردi جىمقىرۋ»، «قۇقىق قورعاۋ ورگانى، ارناۋلى مەملەكەتتىك ورگان قىزمەتكەرىنىڭ، اسكەري قىزمەتشىنىڭ ومىرىنە قولسۇعۋشىلىق» جانە ت ب باپتار بويىنشا ايىپ تاعىلعان. سوت بارىسىندا كۇدىكتىلەردىڭ كەيبىرى تاعىلعان ايىپپەن كەلىسپەسە، ەندى ءبىرى ءىشىنارا كەلىسكەن.