رەسەي قۇرامىنداعى قالماقيانىڭ استاناسى ەليستا قالاسىنىڭ تۇرعىنى يگور ساندجيەۆ Mgorod.kz سايتىنا بەرگەن سۇحباتىندا قازاقستاننىڭ باتىسىنداعى ورال قالاسىندا ەكەنىن جانە بوسقىن مارتەبەسىن العىسى كەلەتىنىن ايتقان. بۇل تۋرالى ورتالىق ازيا جاڭالىقتار قىزمەتى جازدى.

ونىڭ سوزىنشە، 13 ساۋىردە ەڭبەك جانە الەۋمەتتىك قورعاۋ دەپارتامەنتى ونىڭ ءوتىنىشىن قابىلداپ، پانا ىزدەۋشى تۇلعا كۋالىگىن بەرگەن.

ساندجيەۆ سۇحباتتا "اسكەري قيمىلعا قارسى ەكەنىن" اتاپ وتكەن. ول قازاقستان تەرريتورياسىن رەسەيدىڭ ۆولگوگراد وبلىسى جاعىنان كەسىپ وتكەن. ء"جاي عانا تىكەنەك سىمتەمىردى اتتاپ ءوتتىم" دەدى ول. بۇدان سوڭ سايحين اۋىلىنان تاكسيمەن ورال قالاسىنا كەلگەن. سول جاقتا ساندجيەۆ ەڭبەك جانە الەۋمەتتىك قورعاۋ كوميتەتى دەپارتامەنتىنە قايىرىلعان.

ساندجيەۆكە پانا ىزدەۋشى تۇلعا كۋالىگى قۇقىق قورعاۋشىلار ارالاسقاننان كەيىن عانا بەرىلگەن. مۇنى ادام قۇقىعىن قورعاۋ بيۋروسى بولىمشەسىنىڭ جەتەكشىسى پاۆەل كوچەتكوۆ تا راستايدى. ول ەڭبەك جانە حالىقتى الەۋمەتتىك قورعاۋ مينيسترلىگىنە حات جولداعان. 13 ساۋىردە ساندجيەۆتى ەڭبەك جانە حالىقتى الەۋمەتتىك قورعاۋ دەپارتامەنتى قابىلداعان. كوشى-قون پوليتسياسى مەن ۇقك قىزمەتكەرلەرى ونى شەكارانى كەسىپ ءوتۋ بويىنشا تەرگەگەننەن كەيىن قۇجات بەرىلگەن.

دەپارتامەنت وكىلدەرىنىڭ ايتۋىنشا، ساندجيەۆكە بەرىلگەن كۋالىك ءۇش ايعا جارامدى. وسى ۋاقىت ارالىعىندا تىركەۋ مالىمەتى جيناقتالىپ، كوميسسياعا بەرىلەتىن ماتەريالدار دايىندالادى. بوسقىن مارتەبەسىن بەرۋ ماسەلەسىن كوميسسيا قارايدى.

اقپاراتقا قاراعاندا، يگور ساندجيەۆ رەسەي قۇرامىنداعى قالماقيا استاناسى ەليستا قالاسىندا تۇرعان. قۇرىلىس سالاسىندا ىستەگەن. بىلتىر قىركۇيەكتە رەسەيدە موبيليزاتسيا باستالعاننان كەيىن ونى "اسكەري تىركەۋ مالىمەتتەرىن جاڭارتۋ ءۇشىن" اسكەري كوميسسارياتقا شاقىرعان. سول جاقتان اسكەري بولىمگە اپارىپ، تولقۇجاتىن تاركىلەپ العان. ايتۋىنشا، العاشقى تولەم تولەنگەن سوڭ اسكەري بولىمدە "بەيبەرەكەتسىزدىك" باستالعان. موبيليزاتسيالانعاندار "كوپ ءىشىپ، ءبىر-بىرىمەن توبەلەسە باستاعان". ال "اسكەري دايىندىق" دەگەنى اسكەري جارعى جاتتاۋ مەن ساپ تۇزەپ جۇرۋدەن اسپاعان.

ساندجيەۆتىڭ ەسەبىنشە، شامامەن 200 ادام دايىندىقتان وتكەن. دايىندىق كەزىندە اسكەري بولىمنەن تورتتەن ءبىرى كەتىپ قالعان.

بىلتىر قااشادا يگور ساندجيەۆ اسكەري بولىمنەن قاشىپ، ماسكەۋگە كەلىپ، شامامەن ءبىر ايدان سوڭ سانكت-پەتەربۋرگكە بارعان. بيىل قاڭتار سوڭىندا بەلارۋسپەن شەكارادان زاڭسىز ءوتىپ، شەتەل ەلشىلىكتەرىن ىزدەگەن. الايدا بەلارۋستىڭ ارنايى قىزمەتى ونى ۇستاپ، رەسەيگە دەپورتاتسيالاعان. ساندجيەۆ ۆولگوگرادتاعى اسكەري كومەنداتۋراعا تاپسىرىلعان، بىراق اسكەري باقىلاۋعا قاراماستان سىتىلىپ كەتكەن.

بىلتىر جەلتوقساندا قازاقستان موبيليزاتسيادان قاشقان فەدەرالدىق كۇزەت قىزمەتىنىڭ مايورى ميحايل ءجيليندى رەسەيگە تاپسىرعان ەدى. ول شەكارانى كەسىپ وتكەننەن كەيىن ءبىر تاۋلىك ىشىندە قازاقستاننان ساياسي باسپانا سۇراعان.

بيىل رەسەي سوتى ءجيليندى "موبيليزاتسيا جاعدايىندا اسكەردەن قاشقانى ءۇشىن" جانە "شەكارانى زاڭسىز كەسىپ وتكەنى ءۇشىن" 6,5 جىل تۇرمەگە كەسىپ، جازاسىن قاتاڭ رەجيمدەگى كولونيادا وتەۋدى بۇيىرعان. جيلين اسكەري اتاقتارىنان ايىرىلدى. زاڭ بويىنشا، بۇل ودان مەملەكەتتىك شەكارانى كەسىپ ءوتۋ تۋرالى ايىپتى الىپ تاستاۋعا مۇمكىندىك بەرەدى. قازاقستان زاڭناماسى ەلىنەن زاڭسىز تۇردە قاشىپ كەلگەن ازاماتتاردى وتانىنا قايتارۋعا تىيىم سالادى. الايدا قازاقستان بيلىگى رەسەي ازاماتىنا بوسقىن مارتەبەسىن بەرۋدەن باس تارتقان.