10 ساۋىردە وتكەن سوت وتىرىسىندا جانبولات مامايعا ۇكىم وقىلدى. سۋديا ەلەنا كۆان ونى كىنالى دەپ تانىپ، 6 جىلعا شارتتى جازاعا كەستى جانە جۋرناليستيكامەن، قوعامدىق-ساياسي ۇيىمداردىڭ جۇمىسىنا ارالاسۋعا، الەۋمەتتىك جەلىلەردى پايدالانۋعا تىيىم سالدى. ول جازا مەرزىمى اياقتالعانعا دەيىن پروباتسيالىق باقىلاۋدا بولادى.

جانبولات مامايدىڭ ءوزى سوت شەشىمىمەن كەلىسپەيتىنىن، ءىستىڭ ساياسي استارى بارىن، الداعى ۋاقىتتا اپەللياتسيالىق شاعىم تۇسىرەتىنىن ايتتى.

تىركەلمەگەن «دەموكراتيالىق پارتيا» قۇرۋ باستاماشىل توبىنىڭ جەتەكشىسى، وپپوزيتسيالىق ساياساتكەر جانبولات مامايعا قاڭتار وقيعاسى كەزىندە «جاپپاي تارتىپسىزدىك ۇيىمداستىرۋ»، «جالعان اقپارات تاراتۋ»، «بيلىك وكىلىنە ءتىل تيگىزۋ» باپتارى بويىنشا ايىپ تاعىلعان.

6 ساۋىردە ماماي وزىنە تاعىلعان ايىپتارمەن كەلىسپەي، «سوتتا مەن ەمەس، ەلدى 30 جىل توناعاندار جاۋاپ بەرۋى ءتيىس ەدى. «باس كەسپەك بولسا دا، ءتىل كەسپەك جوق»، سىزدەر زاڭدى پايدالانىپ مەنىڭ ءتىلىمدى كەسىپ وتىرسىزدار. بۇل مەنىڭ سوڭعى ءسوزىم ەمەس» دەگەن.