پرەزيدەنت قاسىم-جومارت توقاەۆ «جاپپاي تارتىپسىزدىككە شاقىرعاندارعا» جازانى كۇشەيتەتىن تۇزەتۋلەرگە قول قويدى. بۇل جونىندە «ازاتتىق» راديوسى حابارلادى. 

قۇجاتتىڭ تولىق اتاۋى – «قىلمىستىق سوت ءىسىن جۇرگىزۋ، جازا اتقارۋ سالاسىنداعى ادام قۇقىقتارى، سونىمەن بىرگە ازاپتاۋلاردىڭ جانە باسقا دا قاتىگەز، ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتتەردىڭ الدىن الۋ ماسەلەلەرى بويىنشا قر كەيبىر زاڭنامالىق اكتىلەرىنە وزگەرىستەر مەن تولىقتىرۋدار ەنگىزۋ تۋرالى».

قۇجات «جاپپاي تارتىپسىزدىككە شاقىرۋ» بابى (272-باپ، 1-بولىگى) بويىنشا جازانى 3 جىلدان 5 جىلعا، تەلەكوممۋنيكاتسيا جەلىلەرىن پايدالانۋ ارقىلى جاسالعان قىلمىس جازاسىن 3 جىلدان 7 جىلعا دەيىن كوبەيتۋدى ۇسىنادى. قىلمىستىق توپ قۇرامىندا جاسالعان بۇزاقىلىق ءۇشىن جازانى 5 جىلدان 7 جىلعا كوبەيتۋدى ۇسىنادى. ەندى بۇل باپ بويىنشا ايىپتالعان ادامدار شارتتى تۇردە مەرزىمىنەن بۇرىن بوساتۋ مۇمكىندىگىنەن ايىرىلادى.

بۇعان قوسا، قىلمىستىق كودەكستەگى «ازاپتاۋ» بابىنا «ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتى ءۇشىن» دەگەن قۇقىقبۇزۋشىلىقتىڭ جاڭا قۇرامى ەنگىزىلەدى. زاڭ جوباسى اۆتورلارىنىڭ تۇسىندىرۋىنشە، «بۇل ازاپتاۋدى قاتىگەزدىكتەن اجىراتۋعا، زاڭناماداعى ولقىلىقتاردى جويۋعا مۇمكىندىك بەرەدى».

زاڭ سونىمەن بىرگە تۇرمىستىق زورلىق-زومبىلىق ءۇشىن جاۋاپكەرشىلىكتى دە كۇشەيتەدى. اتاپ ايتقاندا، قىلمىستىق كودەكستەگى 106 («دەنساۋلىققا قاساقانا اۋىر زيان كەلتiرۋ») جانە 107-باپتارى («دەنساۋلىققا قاساقانا اۋىرلىعى ورتاشا زيان كەلتiرۋ») بويىنشا جاۋاپكەرشىلىك كۇشەيتىلەدى.

قازاقستاندا «جاپپاي تارتىپسىزدىككە» شاقىرعاندارعا جازانى قاتايتۋ كەمىندە 238 ادام قازا بولعان قاڭتار وقيعاسىنان كەيىن ۇسىنىلىپ وتىر. رەسمي مالىمەت بويىنشا، قاندى قاڭتارعا بايلانىستى جۇزدەگەن ادام «جاپپاي تارتىپسىزدىك» بويىنشا ايىپتالىپ، ولارعا ۇكىم شىققان. اراسىندا ازاماتتىق بەلسەندىلەر دە بار.

تەرگەۋ كەزىندە كەيبىر ايىپتالۋشىلار ءىس «بىرجاقتى تەرگەلگەنىن» ايتقان. قۇقىق قورعاۋشىلار مەن بەلسەندىلەر قاڭتار وقيعاسى جان-جاقتى، ءادىل تەرگەلمەدى، «بەيبىت نارازىلىققا شىققاندارعا بيلىك نەگىزسىز وق اتتى، بەيبىت ميتينگ مەن بۇلىكتى بىرىكتىرىپ قاراستىرۋعا تالپىندى» دەپ ەسەپتەيدى. بيلىك حالىقارالىق ۇيىمداردىڭ وقيعانى مەملەكەت اۋقىمىنان كەڭ دارەجەدە تەرگەۋ تۋرالى ۇسىنىسىن كەرى قايتارعان.