وزبەكستان پرەزيدەنتى شاۆكات ميرزياەۆ 6 ناۋرىزدا زاڭ شىعارۋشى ولي ماجليس دەپۋتاتتارىمەن، سەناتورلارمەن جانە جوعارعى سوت باسشىلىعىمەن كەزدەسىپ، ەل كونستيتۋتسياسىنا ەنگىزىلەتىن وزگەرىستەرگە بايلانىستى كەڭەستى، -دەپ جازدى ازاتتىق راديوسى.

وزبەكستان پرەزيدەنتى ءباسپاسوز قىزمەتىنىڭ حابارلاۋىنشا، دەپۋتاتتار قوعامنان تۇسكەن 200 مىڭنان استام ۇسىنىستى قاراپ، حالىقارالىق تاجىريبەنى دە ەسكەرگەن.

سونىڭ ناتيجەسىندە وزبەكستان كونستيتۋتسياسىنا ەنگىزىلەتىن وزگەرىستەر مەن تولىقتىرۋلار تۋرالى زاڭنىڭ اقىرعى نۇسقاسى ازىرلەنگەن.

وزبەكستان كونستيتۋتسياعا ەنەتىن وزگەرىستەردى 2022 جىلعى 25 ماۋسىمدا جاريالاپ، قوعامنىڭ تالقىلاۋىنا 10 كۇن ۋاقىت بەرگەن. الايدا قاراقالپاقستان اۆتونوميا رەسپۋبليكاسىنىڭ ەگەمەندىك ستاتۋسى مەن وزبەكستان قۇرامىنان شىعۋ قۇقىعى الىنىپ قالعانى قاراقالپاقستاندا جاپپاي نارازىلىق تۋعىزعان.

وزبەك بيلىگى تاراتقان اقپاراتقا قاراعاندا، 2022 جىلعى 1-2 شىلدەدە بولعان نارىزىلىق اكتسياسى كەزىندە 21 ادام ءولىپ، 243 ادام جارالانعان. قۇقىق قورعاۋ ورگاندارىنىڭ قىزمەتكەرلەرى دە جارالانعان. قۇقىق قورعاۋشىلار ولگەندەر بۇدان الدەقايدا كوپ دەپ ەسەپتەيدى.

نوكىس وقيعاسى – 2005 جىلى وزبەكستاننىڭ ءاندىجان قالاسىندا بولعان قاندى وقيعادان كەيىنگى ءىرى نارازىلىق اكتسياسى.

وتكەن ايدا وزبەكستاننىڭ بۇحارا قالاسىندا نوكىس وقيعاسىنا بايلانىستى سوت وتىرىسى بولىپ، "نارازىلىقتى ۇيىمداستىرۋشى" دەگەن ايىپپەن قوعام بەلسەندىسى داۋلەتمۇرات ءتاجىمۇراتوۆ 16 جىلعا، تاعى 17 ادام ءۇش جىلدان سەگىز جىلعا دەيىن سوتتالعان. 39 ادامنىڭ ءىسى قارالىپ جاتقان تاعى ءبىر ىستە پروكۋرور ايىپتالۋشىلاردى ۇزاق مەرزىمگە تۇرمەگە قاماۋدى سۇراعان.

وزبەكستاننىڭ بۇحارا قالاسىندا نۇكىس وقيعاسىنا بايلانىستى ايىپتالعان 22 ادامنىڭ سوتى باستالادى

2022 جىلعى قازاندا سىرداريا وبلىسىندا وتكەن كەڭەستە وزبەكستان پرەزيدەنتى شاۆكات ميرزياەۆ "كونستيتۋتسيانى وزگەرتۋگە اسىعۋدىڭ قاجەتى جوق" دەگەن ەدى.

زاڭ جوباسى دايىن بولعان سوڭ، وزبەكستان كونستيتۋتسياسىنا وزگەرىس ەنگىزۋ جونىندە رەفەرەندۋم وتەدى. ازىرگە ناقتى قاي ۋاقىتتا بولاتىنى بەلگىسىز رەفەرەندۋمعا وزبەكستان پرەزيدەنتىنىڭ وكىلەتىن بەس جىلدان جەتى جىلعا ۇزارتۋ ماسەلەسى دە شىعارىلادى دەگەن بولجام بار.