1 ناۋرىز تۇندە تىركەلمەگەن وپپوزيتسيالىق دەموكراتيالىق پارتيا وكىلى بەرىك ءحاميدۋلليندى ءۇيىنىڭ ماڭىندا بەلگىسىز بىرەۋلەر ۇرىپ كەتتى. بۇل جونىندە الەۋمەتتىك جەلىدە ساياسي بەلسەندى ابزال دوستياروۆ حابارلادى.

ابزال دوستياروۆتىڭ ايتۋىنشا، حاميدۋللين ونىڭ سايلاۋداعى سەنىمدى وكىلى. ول ۇگىت-ناسيحات جۇمىستارى اياقتالعاننان كەيىن، تۇنگى ساعات وندار شاماسىندا ۇيىنە قايتىر بارا جاتقان جەرىندە سوققىعا جىعىلعان.

– بەرىك مەنىڭ وسى سايلاۋدا سەنىمدى وكىلىم،ول كىسى بۇگىن تاڭنان كەشكە دەيىن مەنىڭ ۇگىت-ناسيحات پاراقشالارىمدى تاراتىپ جۇرگەن ەدى، جاڭا عانا بەرىك اعانى بەلگىسىز بىرەۋلەر ۇرىپ كەتتى. بەرىك اعا ەشكىممەن بايلانىسپايتىن،جاسى ەلۋدەن اسقان جىگىت اعاسى. بيلىك كۇرەسكەر ازاماتتاردى توقتاتۋ ءۇشىن، جولدان تايدىرۋ ءۇشىن, وسىنداي لاس ارەكەتتەرگە بارىپ وتىر, – دەپ جازدى دوستياروۆ.

بەرىك ءحاميدۋلليننىڭ ءوزىن كىمدەردىڭ ۇرعانىن بىلمەيدى. ارتقى جاعىنان جاسالعان سوققىدان ەسىنەن تانىپ قالعان.

– قانشا ادامنىڭ ۇرعانىن بىلمەيمىن. اياق استىنان بولدى. ارتىمنان كەلىپ ۇرعاننان كەيىن ەسىمنەن تانىپ قالىپپىن. قازىر باسىم اينالىپ تۇر, – دەگەن ءحاميدۋلليننىڭ ءوزى «ازاتتىق» راديوسىنا.

بەيسەنبى كۇنى پوليتسيا ودان جاۋاپ العان. ازىرگە قانداي باپ بويىنشا ءىس قوزعالعانى بەلگىسىز. پارتيا وكىلدەرى وقيعانىڭ ساياسي استارى بولۋى مۇمكىن دەپ بولجايدى. شابۋىلداۋشىلار ءحاميدۋللينىڭ قالتاسىنداعى اقشا، تەلەفونعا تيىسپەگەن.