قاراقالپاقستاندا 2022 جىلعى 1-2 شىلدەدەگى قانتوگىس بويىنشا قوزعالعان ەكىنشى قىلمىستىق ءىس قارالىپ جاتقان سوتتا پروكۋرور 39 سوتتالۋشىعا 12 جىلعا دەيىن تۇرمە جازاسىن سۇرادى. بۇل تۋرالى وزبەكستان جوعارعى سوتىنىڭ ءباسپاسوز قىزمەتى حابارلادى، -دەپ جازدى ورتالىق ازيا جاڭالىقتار قىزمەتى.

سوتتالۋشىلاردىڭ كوبىنە "جاپپاي تارتىپسىزدىك ۇيىمداستىردى" دەگەن ايىپ تاعىلعان. جەتى سوتتالۋشى "قوعام تارتىبىنە قاۋىپ توندىرەتىن ماتەريالدار تاراتتى" دەپ ايىپتالعان. تاعى جەتى سوتتالۋشىعا "ەكى نەمەسە ودان كوپ ادامدى قاساقانا اۋىر جارالادى" دەگەن ايىپ تاعىلعان.

ءتورت سوتتالۋشىنىڭ ۇستىنەن "قارۋدى زاڭسىز يەمدەنۋ" بابى نەگىزىندە ءىس قوزعالعان.

نوكىس وقيعاسىنا قاتىستى العاشقى سوت پروتسەسى بۇحارا قالاسىندا بيىل 31 قاڭتاردا اياقتالدى. سوت بەلسەندى داۋلەتمۇرات ءتاجىمۇراتوۆتى باستى ايىپكەر دەپ تانىپ، ونى 16 جىلعا سوتتادى. تاعى 17 ادام 3 جىلدان 8,5 جىلعا دەيىن تۇرمە جازاسىن الدى. ءتورت ادام سوت زالىندا بوساتىلدى.

رەسمي مالىمەت بويىنشا، نوكىستەگى وقيعا كەزىندە 21 ادام قازا بولىپ، 243 ادام جارالانعان. باسكوتەرۋ كۇشپەن باسىلدى، بىراق وزبەك بيلىگى اسكەريلەر نارازىلىققا شىققان ازاماتتاردى اتتى دەگەندى جوققا شىعارىپ وتىر.