اقش مەملەكەتتىك حاتشىسى ەنتوني بلينكەن 28 اقپان - 3 ناۋرىز ارالىعىندا قازاقستان، وزبەكستان جانە ۇندىستانعا رەسمي ساپارمەن بارادى دەپ حابارلادى اقش مەملەكەتتىك دەپارتامەنتىنىڭ ءباسپاسوز حاتشىسى. بۇل تۋرالى ورتالىق ازيا جاڭالىقتار قىزمەتى جازدى.

28 اقپاندا اقش مەملەكەتتىك حاتشىسى ەنتوني بلينكەن قازاقستانعا كەلەدى. "بۇل – ونىڭ قازاقستانعا العاشقى ساپارى" دەپ حابارلادى 24 اقپاندا قازاقستان سىرتقى ىستەر مينيسترلىگى.

ۆەدومستۆونىڭ حابارلاۋىنشا، استانادا اقش مەملەكەتتىك حاتشىسىن پرەزيدەنت قاسىم-جومارت توقاەۆ قابىلدايدى. مەملەكەتتىك حاتشى قازاقستان سىرتقى ىستەر ءمينيسترى مۇحتار تىلەۋبەردىمەن ەكىجاقتى كەلىسسوز جۇرگىزەدى. سول كۇنى استانادا بلينكەن مەن ورتالىق ازيا ەلدەرىنىڭ سىرتقى ساياسات مەكەمەلەرى باسشىلارى قاتىساتىن س5+1 فورماتىنداعى كەزدەسۋ وتەدى. وندا وڭىرلىك ىنتىماقتاستىق جانە اقش-پەن سەرىكتەستىكتى دامىتۋ ماسەلەلەرى تالقىلانادى.

اقش مەملەكەتتىك دەپارتامەنتىنىڭ حابارلاۋىنشا، بلينكەن 28 اقپان جانە 3 ناۋرىز ارالىعىندا قازاقستانمەن قاتار وزبەكستان مەن ۇندىستانعا دا ساپارلايدى. ول استانادا قازاقستاندىق رەسمي تۇلعالارمەن كەزدەسىپ، ەكىجاقتى ارىپتەستىكتى نىعايتۋ ماسەلەلەرىن تالقىلايدى.

C5+1 فورماتىنداعى كەزدەسۋگە قاتىسىپ، اقش-تىڭ ورتالىق ازيا ەلدەرىنىڭ تاۋەلسىزدىگى، ەگەمەندىگى مەن اۋماقتىق تۇتاستىعىن قولداۋدان اينىمايتىنىن جەتكىزبەك.

س5+1 – ورتالىق ازياداعى بەس ەل (قازاقستان، قىرعىزستان، تاجىكستان، وزبەكستان، تۇركىمەنستان) جانە اقش اراسىنداعى قارىم-قاتىناستىڭ فورماتى. بۇل فورمات اياسىندا التى ەل ەكونوميكا، ەكولوگيا جانە قاۋىپسىزدىك جونىندەگى ماسەلەلەردى تالقىلايدى.