ادۆوكات سەرجان پىراليەۆ قازاقستان باس اسكەري پروكۋراتۋراسىنىڭ سارباز ولىمىنە قاتىستى تاراتقان مالىمدەمەسى "جالعان" دەپ ەسەپتەيدى. بۇل تۋرالى ول ازاتتىق تىلشىسىنە ايتتى.

21 اقپاندا قازاقستانىڭ باس اسكەري پروكۋراتۋراسى جامبىل وبلىسىنداعى ءشولدالا شەكارا زاستاۆاسىندا قايتىس بولعان سارباز بەكبول ميراشتىڭ سەكسۋال زورلىق كورگەنى تۋرالى مالىمەت راستالماعانىن، ءوز-وزىنە قول سالۋعا يتەرمەلەگەن بولۋى مۇمكىن دەگەن كۇدىكتى ۇستالعانىن حابارلاعان.

الايدا كۇدىكتىنىڭ ادۆوكاتى سەرجان پىراليەۆتىڭ ايتۋىنشا، "سەكسۋال زورلىق كورگەنى راستالمادى" دەۋ ءۇشىن مولەكۋلالىق-گەنەتيكالىق ساراپتاما قورىتىندىسى تولىق شىعۋى كەرەك، تەرگەۋ ءبىتۋى كەرەك. بىراق ءالى ەشقايسىسى اياعىنا جەتپەگەن.

"بۇعان دەيىن جاسالعان مولەكۋلالىق-گەنەتيكالىق ءتورت ساراپتاما قورىتىندىسىن قايدا جىبەرەدى؟ سوندا شۇلعاۋى مەن اياقكيىمىنەن باسقا جەرىنىڭ بارىنەن (اۋزى، ىشكيىمى) تابىلعان شاۋەتتى قايدا جىبەردى؟ ەكى نە ودان دا كوپ ەر ادامنىڭ دنق-سى تابىلدى، سونىڭ كىمگە تيەسىلى ەكەنىن ىزدەپ جاتىر. شەكارا زاستاۆاسىندا 88 اسكەري قىزمەتكەر بولعان. ولارعا دا ساراپتاما تاعايىندادى. 17 اقپاندا سول زاستاۆادا تاعى ينجەنەرلىك ساپەر روتاسىنىڭ 42 جاۋىنگەرى جاتقانىن ءبىلدىم. ولارعا دا مولەكۋلالىق-گەنەتيكالىق ساراپتاما جاسالىپ جاتىر" دەدى پىراليەۆ ازاتتىققا.

باس اسكەري پروكۋراتۋرا تاراتقان حابارلامادا "سۋيتسيدكە يتەرمەلەۋى مۇمكىن دەگەن ادام بەكبول ميراشقا جانە وزگە دە جاۋىنگەرلەرگە ۇدايى پسيحولوگيالىق قىسىم كورسەتىپ، سوققىعا جىققان" دەلىنگەن.

ادۆوكات پىراليەۆ بۇل مالىمەتكە دە كەلىسپەيدى. ونىڭ ايتۋىنشا، بەكبول ميراشتىڭ دەنەسىنەن ۇرىپ-سوعۋ بەلگىلەرى تابىلماعان.

"تەرگەۋ ماتەريالدارىندا بەس ادام ءتۇن ورتاسىندا ىشىمدىك ىشكەنى جازىلعان. مۇنى ءبارى مويىنداعان. ونىڭ ىشىندە قايتىس بولعان جاۋىنگەر دە بار. بىراق ونىڭ قانىنان الكوگول تابىلمادى. قازىر سول كەزدەگى ءتورت ادام كۋاگەر، جابىرلەنۋشى رەتىندە تەرگەلىپ جاتىر. ولاردىڭ ايتۋىنشا، بەكبول ميراشتىڭ دا، باسقالارىنىڭ دا باسىنان بىرەۋ ورىندىقپەن ۇرعان. بىراق ءمايىتتىڭ سوت-مەديتسينا ساراپتاماسىندا ءبىر عانا جاراقاتى بارى جازىلعان، ول – موينىنداعى بەلدىكتىڭ ءىزى. ورىندىقپەن ۇرسا، باسىندا ىسىك قالار ەدى، ونداي جوق. كۋاگەرلەردىڭ ءسوزى كۇمان تۋدىرادى" دەيدى ادۆوكات.

ونىڭ پايىمداۋىنشا، باس اسكەري پروكۋراتۋرا "كۋاگەرلەردىڭ ءسوزىن سويلەپ وتىر".

"بىراق ەش دالەلسىز سوزگە سەنىپ، ءالى اياقتالماعان تەرگەۋگە قورىتىندى جاساۋعا بولمايدى" دەيدى پىراليەۆ.

بەكبول ميراش ءىسىن ىشكى ىستەر مينيسترلىگىندەگى باس تەرگەۋ دەپارتامەنتى تەرگەپ جاتىر.

ال جابىرلەنۋشى تاراپتىڭ ادۆوكاتى ايمان وماروۆا دا باس اسكەري پروكۋراتۋرانىڭ مالىمدەمەسىمەن كەلىسپەيدى.

- [اسكەري پروكۋراتۋرا] سوت ساراپتاماسىنىڭ ەشقانداي قورىتىندىسى شىقپاي جاتىپ "زورلىق-زومبىلىق بولعان جوق" دەپ تۇر. سوندا ولارعا قالاي سەنەمىز؟ [اسكەري پروكۋراتۋرا] وبەكتيۆتى بولۋى كەرەك، تەرگەۋ دە ءادىل بولۋى كەرەك . ولار تەرگەۋ بىتپەي جاتىپ وسىلاي دەپ وتىر. ەندى ولار ءىستى سوتقا "زورلىق-زومبىلىق بولمادى" دەپ جازدىرىپ جىبەرەدى دەپ ويلايمىن، - دەيدى وماروۆا.

وتكەن ايدا پىراليەۆ "ولگەن شەكاراشى سەكسۋال زورلىق پەن بوپساعا ۇشىراعان" دەپ مالىمدەگەن ەدى. ساراپتاما ناتيجەسىن العا تارتقان ادۆوكات ساربازدىڭ اۋزى مەن ىشكيىمىنەن بىرنەشە ەر ادامنىڭ بيوماتەريالى تابىلعانىن حابارلاعان. وسىدان كەيىن ىشكى ىستەر مينيسترلىگى "ادۆوكات ەتيكانى بۇزدى", "شىندىققا ساي كەلمەيتىن تۇجىرىم ويلاپ تاپتى" دەپ ايىپتاعان.

قازاقستانىڭ باس اسكەري پروكۋراتۋراسى ادۆوكات سەرجان پىراليەۆتىڭ ارەكەتىن ارنايى قاراستىراتىنىن مالىمدەگەن.

2022 جىلعى 19 تامىزدا قاتارداعى جاۋىنگەر بەكبول ميراشتىڭ ءشولدالا شەكارا زاستاۆاسىندا اسىلىپ قالعانى ءمالىم بولعان. ونىڭ تۋىستارىنا كومانديرلەرى "جۇرەتىن قىزىمەن ۇرسىسىپ قالعان سوڭ، ءوز-وزىنە قول سالعان" دەپ حابارلاعان. بەكبول ميراشتىڭ تۋىستارى ونى اسكەردەگى الىمجەتتىكتەن ءولدى دەپ ەسەپتەيدى.

قازاقستان قورعانىس مينيسترلىگى بەكبول ميراشتىڭ ءولىمى "قارۋلى كۇشتەرگە قاتىسى جوق" ەكەنىن مالىمدەگەن. الايدا قارۋلى كۇشتەر قاتارىندا ءولىم-ءجىتىمنىڭ كوبەيۋىنە بايلانىستى "اسكەردە كىسى ولىمىنە جول بەرمەۋ" دەيتىن باعدارلاما قابىلداعان.