"ۆرەميا" باسىلىمىنىڭ ءتىلشىسى، Kozachkov offside تەلەگرام-ارناسىنىڭ اۆتورى ميحايل كوزاچكوۆقا قاتىستى بۇلتارتپاۋ شاراسى وزگەرتىلدى. بۇل تۋرالى ورتالىق ازيا جاڭالىقتار قىزمەتى جازدى.

الماتى تەرگەۋ سوتى 20 جەلتوقساننان بەرى تەرگەۋ يزولياتورىندا وتىرعان كوزاچكوۆتى ۇيقاماققا جىبەردى. بۇل جونىندە سەنبى كۇنى ء"ادىل ءسوز" ءسوز بوستاندىعىن قورعاۋ قورى حابارلادى.

كوزاچكوۆ ۇيقاماققا جىبەرىلگەنىن بۇرىن "ۆرەميا" گازەتىندە جۇمىس ىستەگەن جۋرناليست ۆاديم بورەيكو دا حابارلادى.

كوزاچكوۆتى 18 جەلتوقساندا قارجى مونيتورينگى اگەنتتىگىنىڭ قىزمەتكەرلەرى ۇستاعان ەدى. ەكى كۇننەن سوڭ سوت ونى ەكى ايعا قامادى. 30 قاڭتاردا سوت قاماۋ مەرزىمىن 18 ناۋرىزعا دەيىن ۇزارتتى.

كوزاچكوۆ "بولات نازارباەۆتىڭ كومەكشىسى" دەپ اتالعان ەلدوس قوسپاەۆتىڭ قىلمىستىق توبىنا رەيدەرلىك جاساۋعا كومەكتەستى دەگەن كۇدىككە ىلىنگەن. اگەنتتىك وكىلدەرىنىڭ ايتۋىنشا، قوسپاەۆ "رەيدەرلىك قۇرباندارىنا اقپاراتتىق شابۋىل جاساۋ ءۇشىن كوزاچكوۆتىڭ قىزمەتىنە جۇگىنگەن". كوزاچكوۆ سول ءۇشىن "قىلمىستىق توپ مۇشەلەرىنەن" 52 ملن تەڭگە (112 مىڭ دوللار) سىياقى العان دەپ ايتىلادى.

كوزاچكوۆ ادۆوكاتى ارقىلى ايىپتاردى تەرىستەپ، ءوزىن كاسىبي قىزمەتى ءۇشىن قۋدالاپ وتىر دەپ مالىمدەدى.

كوزاچكوۆ ۇستالعان سوڭ ەلدە ونداعان باسىلىم مەن مەديا ۇيىمى قازاقستان پرەزيدەنتى قاسىم-جومارت توقاەۆقا قايىرىلىپ، ءجۋرناليستى بوساتۋعا ۇندەدى. قازاقستان جۋرناليستەر وداعى "ورگانداردان ەل زاڭىن ساقتاۋدى", "كوزاچكوۆتىڭ ءىسىن جان-جاقتى، وبەكتيۆ تۇردە تەكسەرۋدى" تالاپ ەتتى. ء"ادىل ءسوز" قورى "كوزاچكوۆتىڭ قۇقىعى ورەسكەل بۇزىلعانىن" مالىمدەپ، ونى بوساتۋدى سۇرادى.

نيۋ-يوركتە ورنالاسقان جۋرناليستەردى قورعاۋ كوميتەتى (CPJ) قازاقستاندا جەمقورلىق دەرەكتەرى تۋرالى جازىپ جۇرگەن جۋرناليست ۇستالعانىنا الاڭداۋشىلىق ءبىلدىردى.

بۇعان دەيىن قازاقستان پرەزيدەنتىنىڭ ءباسپاسوز حاتشىسى رۋسلان جەلدىباي "بۇل ءىس قازاقستان زاڭناماسىنا ساي تەڭ قۇقىقتار شەڭبەرىندە قارالۋعا ءتيىس" دەپ جازعان.