تىركەلمەگەن وپپوزيتسيالىق دەموكراتيالىق پارتيا مۇشەلەرى ءماجىلىس جانە ءماسليحات سايلاۋىنا قاتىساتىندارىن مالىمدەدى. 

– دەموكراتيالىق پارتيانى قۇرۋ جونىندەگى ۇيىمداستىرۋ كوميتەتىنىڭ بەلسەندىلەرىمەن اقىلداسا كەلە، بەلگىلى ساراپشىلارمەن، ساياساتتانۋشىلارمەن كەڭەسە وتىرىپ، ءبىز الداعى پارلامەنت سايلاۋىنا قاتىسامىز دەگەن شەشىم قابىلدادىق! پارلامەنت اتقارۋشى بيلىكتىڭ ايتقانىن ورىنداپ، دەگەنىن جاساپ وتىراتىن نوتاريۋس بولماۋى ءتيىس, – دەپ جازدى باستاماشىل توپ مۇشەسى ينگا يمانباي الەۋمەتتىك جەلىدەگى پاراقشاسىنا.

يمانباي سايلاۋعا دەمپارتيا اتىنان قاتىساتىن ادامداردىڭ اتى-ءجونىن ايتپادى. ول ۇمىتكەرلەر الماتى قالاسىنان عانا ەمەس، وزگە دە ايماقتاردان سايلاۋعا تۇسەتىنىن مالىمدەدى.

– ماجىلىس سايلاۋىنا تەك قانا الماتى قالاسى بويىنشا ەمەس، قازاقستاننىڭ باسقا دا وڭىرلەرىنەن ازاماتتار قاتىسادى دەگەن بايلامعا كەلدىك. پارلامەنت اتقارۋشى بيلىكتىڭ ايتقانىن ورىنداپ، دەگەنىن جاساپ وتىراتىن نوتاريۋس بولماۋى ءتيىس, – دەدى ول.

دەموكراتيالىق پارتيا جەتەكشىسى جانبولات ماماي قازىر ۇيقاماقتا وتىر. وعان «بيلىك وكىلىنە ءتىل تيگىزۋ» جانە «جالعان اقپارات تاراتۋ» باپتارى بويىنشا ايىپ تاعىلعان. جاقىندا وعان قاڭتار وقيعاسى كەزىندە «جاپپاي تارتىپسىزدىك ۇيىمداستىردى» دەگەن ايىپ قايتادان تاعىلعان.

قازاقستاندا كەزەكتەن تىس ءماجىلىس جانە ءماسليحات سايلاۋى 19 ناۋرىزدا وتەدى. پرەزيدەنت قاسىم-جومارت توقاەۆ 2021 جىلى سايلانعان ءماجىلىس پەن ءماسليحاتتى 19 قاڭتاردا تاراتقان.

بيىلعى پارلامەنت سايلاۋى ەسكى دە جاڭا جۇيە بويىنشا وتەدى. اتاپ ايتقاندا، ۇمىتكەرلەر 30 پايىز ماجوريتارلىق، 70 پايىز پارتيالىق ءتىزىم بويىنشا سايلاۋعا تۇسەدى. بۇنداي قازاقستاندا جۇيە 2004 جىلعا دەيىن بولعان. كەيىننەن 2007 جىلى كونستيتۋتسيا وزگەرىپ، پارلامەنت سايلاۋى تەك پارتيالىق تىزىممەن وتەتىن بولعان.