«التىنشى قاڭتار» بلوگىنىڭ مۇشەسى، تاۋەلسىز جۋرناليست دۋمان مۇحاممەدكارىم ءماجىلىس سايلاۋىنا كانديداتۋراسى وتپەي قالعانىن حابارلادى. بۇل تۋرالى ماسا مەديا جازدى.

– قاسكەلەڭدە ورنالاسقان №12 سايلاۋ وكرۋگى كوميسسياسى مەنىڭ كانديداتۋرامدى وتكىزبەي تاستادى. ولار «سوڭعى ون جىلدا قازاقستاننىڭ ءارتۇرلى قالاسىندا تۇرعانسىڭ» دەپ وتكىزبەدى. زاڭ بويىنشا سوڭعى ون جىلدا قازاقستان اۋماعىندا تۇرساڭ بولدى. كوميسسيا مۇشەلەرى مەنى «قر كونستيتۋتسياسىنىڭ 51 بابىنىڭ 4 تارماعىندا كورسەتىلگەن تالاپتارعا سايكەس كەلمەيدى» دەپ جازىپتى قۇجاتتا. ءبىز مەنى وتكىزبەيتىندەرىن بىلدىك. بۇل جەردە سپەكتاكل بولدى، – دەدى مۇحاممەدكارىم.

ول سوتقا شاعىمداناتىنىن ايتتى. بىراق ۋاقىت تىعىز بولعاندىقتان سايلاۋعا دەيىن ۇلگەرمەيتىن شىعارمىن دەيدى.

– سوتقا شاعىمداناتىن بولامىز. بىراق ۋاقىت تىعىز. سايلاۋ دوداسىنا قايتادان قوسىلا الام با، جوق پا بىلمەيمىن. ءبىزدىڭ سوتتاردىڭ قانداي ەكەنىن بىلەسىزدەر عوي. توقاەۆتىڭ «جاڭا قازاقستانىنىڭ» سيقى وسىنداي. بىراق ءبارىبىر شاعىمدانامىز، – دەدى ول.

20 جىلدان استام ۋاقىت مەملەكەتتىك تەلەارنادا ىستەگەن دۋمان مۇحاممەدكارىم بىلتىر «Ne deidi» يۋتۋب ارناسىن اشقان. ونى قاڭتار وقيعاسى كەزىندە قازا تاپقانداردىڭ تۋىستارى مەن ازاپتالعان ادامداردان العان سۇحباتتارى كوپشىلىككە تانىتتى. ول 2022 جىلدىڭ قازان ايىندا «زاڭسىز ميتينگىگە شاقىردى» دەگەن ايىپپەن 15 تاۋلىككە قامالىپ شىققان. قازىر ونىڭ يۋتۋب ارناسىندا 130 مىڭنان استام جازىلۋشى بار.

وسىدان ءبىراز ۋاقىت بۇرىن الماتىدا ءبىر توپ بەلسەندى ءماجىلىس جانە ءماسليحات سايلاۋىنا قاتىسۋ ءۇشىن «التىنشى قاڭتار» بلوگىن قۇراتىندارىن مالىمدەگەن. وسى بلوكتىڭ اتىنان جۋرناليست دينارا ەگەۋباەۆا، تاۋەلسىز باقىلاۋشى ارايلىم نازاروۆا جانە ت ب سايلاۋعا قاتىسۋ ءۇشىن قۇجاتتارىن تاپسىرعان.